«Japon arýy» baıqaýynda jeńiske jetken ýkraın qyzy ataǵynan bas tartty
ASTANA. KAZINFORM - «Japon arýy» sulýlyq baıqaýynyń jeńimpazy tájden bas tartty. Buǵan aldynda oryn alǵan eki janjal sebep boldy, dep habarlaıdy VVS.
«Japon arýy-2024» baıqaýynyń jeńimpazy, Ýkraınadan shyqqan japondyq áıel Karolına Sııno ataǵynan bas tartty. Bul týraly aqparatty BBC-diń Ýkraınadaǵy qyzmetine onyń anasy rastady. Bul – baıqaý tarıhynda alǵash ret oryn alǵan jaǵdaı.
26 jastaǵy Karolına Sııno eki apta buryn japondyq sulýlyq baıqaýynda jeńimpaz atandy. Ol táj kıgen soń qyzdyń etnıkalyq shyǵý tegi týraly pikirtalastar bastaldy.
Karolına Ýkraınanyń Ternopol oblysynda týǵan. Ata-anasy ajyrasyp, anasy japon jigitine turmysqa shyqqannan keıin 5 jasynda Japonııaǵa kóship kelgen.
Sııno Japonııa azamattyǵyn qabyldap, sulýlyq baıqaýynda jeńiske jetken alǵashqy áıel boldy. Ol japon azamattyǵyn 2022 jyly ǵana alǵan.
Japondyqtar onyń baıqaýda jeńiskke jetkenine qatysty áleýmettik jelilerde eki túrli pikir aıtty: keıbireýler el azamattyǵyn qabyldaǵan áıeldiń táj kııýin quptasa, basqalary onyń dástúrli japondyq sulýlyq ıdealdaryn tanytpaıtynyn aıtty.
Baıqaýdy uıymdastyrýshylardyń aıtýynsha, tóreshiler Karolına Sıınony jeńimpaz dep nyq senimmen tańdaǵan.
«Ol japonsha ádemi jáne durys sóılep-jazady. Ol bizge qaraǵanda kóbirek japondyq», - deıdi uıymdastyrýshy Aı Vada.
Alaıda oqıǵa osymen aıaqtalǵan joq.
Kúni keshe japondyq Shukan Bunshun jýrnaly jáne eldiń basqa da basylymdary Karolına Sıınonyń úılengen adammen qarym-qatynasy týraly jazdy.
Baıqaýdy uıymdastyrýshylar Sııno er adamnyń úılengenin bilmegenin aıtty. Alaıda dúısenbide habarlanǵandaı, qyz ózi júrgen er adamnyń nekede bolǵanyn jáne otbasy bar ekeninen habardar bolǵanyn moıyndaǵan.
Sııno óziniń Instagram paraqshasynda japon tilinde málimdeme jarııalap, ótirigi úshin keshirim surady.
«Maeda myrzanyń áıeline, otbasyna jáne qatysy bar barlyq adamdarǵa qolaısyzdyqtar úshin keshirim suraımyn. Agenttikke bergen túsiniktememde dálsizdikter boldy. Abyrjý men qorqynysh maǵan shyndyqty aıtýǵa múmkindik bermedi», - delingen habarlamada.
Ol sondaı-aq ataǵynan bas tartatynyn da jazdy. Baıqaýdy uıymdastyrýshylar onyń tájden bas tartýyn qabyldady.
Baıqaý qorytyndysy boıynsha birneshe vıtse-mıss tańdalǵanymen, «Japon arýy» ataǵy jyl sońyna deıin bos qalady.
Eske sala ketsek, Ýkraınanyń Ternopol qalasynyń týmasy Karolına Sııno «Japon arýy-2024» baıqaýynyń jeńimpazy atanǵany týraly habarlaǵan bolatynbyz.
