«Japon arýy» baıqaýynda ýkraın qyzy jeńimpaz atandy

Ýkraınanyń Ternopol qalasynyń týmasy Karolına Sııno «Japon arýy-2024» baıqaýynyń jeńimpazy atandy.Biraq oǵan qarsylyq bildirgender kóp boldy, dep jazady VVS.

Ol Japonııadan tys jerde týǵanymen qatar, qatysýshylardyń ishindegi eń úlkeni (26 jasta) edi.

Tájin alǵan Karolına qýanyshtan jylap jiberdi.

«Bolyp jatqannyń bári tús sııaqty» dedi ol japon tilinde.

Karolına 1998 jyly Ternopolde qarapaıym ýkraın otbasynda dúnıege kelgen.

Biraq keıin onyń anasy japon jigitine turmysqa shyǵyp, qyz nebári bes jasynda Nagoıaǵa kóshedi.

Ol jańa eldiń tilin tez meńgerip, ózin naǵyz japon qyzyndaı sezingenimen, eseıgen saıyn barlyǵynyń oǵan oǵash qaraıtynyn uqty.

Karolına 2022 jyly el azamattyǵyn alǵan soń «Japonııa arýy» baıqaýyna qatysýǵa ótinish berdi.

Óziniń aıtýynsha ol muny «adamdardy syrt kelbetine qaraı baǵalamaıtyn qoǵam qurý» úshin jasaǵan.

Qalaı bolǵanda da, Karolınanyń ózge ult ókili bola tura «Japonııa arýy» atanýy japon qyzy qandaı bolýy kerek degen daýǵa maı quıǵandaı boldy.

Daýlasqan eki toptyń biri Karolınanyń jeńisi «ýaqyt belgisi» dese, ekinshi tarap Japonııa arýy basqasha bolýy kerek desti.

Taǵy bireýler ýkraın qyzyn jeńimpaz dep tańdaýdyń saıası astary bar dedi.

Biraq «Japonııa arýy» baıqaýynyń bas uıymdastyrýshysy Aı Vada VVS-ge bergen suhbatynda tóreshilerdiń Karolınany jeńiske ábden laıyq dep tapqanyn aıtty.

«Ol japon tilinde ádemi jáne durys sóıleıdi, erkin jazady. Ol japonǵa bizden góri jaqyn»,-dedi Vada.

Japon azamattyǵyn alǵannan keıin Karolına Instagram paraqshasynda «japonǵa uqsamasam da, osy elde óskendikten japon mentalıtetin boıyma sińirip óstim» dep jazdy.

Sııno – «Japonııa arýy» baıqaýynyń 56-shy jeńimpazy.

Bul 1950 jyldan beri ótkizilip kele jatqan eldegi eń kóne sulýlyq baıqaýy.