Janýarlarǵa qatygezdik tanytqandarǵa qandaı jaza qoldanylady

NUR-SULTAN. QazAqparat –Elimizde janýarlarǵa qatygezdik tanytqandardy ákimshilik jáne quqyqtyq jaýapkershilikke tartý josparlanyp otyr. Bul týraly QR Ekologııa, geologııa jáne tabıǵı resýrstar vıtse-mınıstri Álııa Shalabekova málim etti, dep habarlaıdy QazAqparat tilshisi.

Onyń aıtýynsha, «Janýarlarǵa jaýapkershilikpen qaraý týraly» zań jobasynda janýardyń ómiri, densaýlyǵy jáne jaǵdaıy úshin ıesiniń jeke jaýapkershiligi kózdelgen. Naqtyraq aıtqanda, janýarlarǵa qylmystyq jazalanatyn is-áreket belgileri joq qatygezdikpen qaraǵandar ákimshilik jazaǵa tartylady. Al janýardyń ólimine ákep soqqan quqyq buzýshylyq úshin jaza 120-dan 200 aılyq eseptik kórsetkishke deıin aıyppul salynady. Mundaı qaıtalanǵan kezde aıyppul kólemi 1000 AEK-ke deıin jetedi nemese bir jylǵa deıin bas bostandyǵynan aıyrý jazasy qoldanylady.

«Usynylǵan zań jobasy janýarlarǵa qatysty jaǵymsyz kórinisterge tosqaýyl qoıady. Mundaı kórinisterge ıtterdiń tóbelesin ótkizý, anestezııasyz veterınarııalyq operatsııalar júrgizý, janýarlardy zańsyz óltirý, janýarlardy álsiretý jáne olarǵa ýaqtyly kómek kórsetpeý, qatygezdikpen aýlaý, janýarlardyń eti men maıyn paıdalaný, sondaı-aq jeýge jáne ónim alýǵa arnalmaǵan áreketter jatady»,- dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.

Álııa Shalabekovanyń sózine qaraǵanda, zań jobasynyń erejelerin iske asyrý úshin qoldanystaǵy zańnamaǵa, atap atqanda, Qylmystyq kodekske, Ákimshilik quqyq buzýshylyq týraly kodekske, «Jergilikti memlekettik basqarý jáne ózin-ózi basqarý týraly», «Veterınarııa týraly», «Janýarlar» dúnıesin qorǵaý, ósimin molaıtý jáne paıdalaný týraly» Zańdarǵa ózgerister men tolyqtyrýlar engizilmek.