Jankúıerleriniń ersi qylyǵy úshin birqatar fýtbol klýbyna aıyppul salyndy

ASTANA. QazAqparat - Keshe Qazaqstan fýtbol federatsııasynyń otyrysynda birqatar klýbqa shara qoldaný máselesi kóterildi, dep habarlaıdy QazAqparat uıymǵa silteme jasap.

Atap aıtqanda, «Jetisý»-«Tobyl» matchynda jankúıerleri tártiptik reglamentti buzyp, belgili bir adamdardyń atyn atap, aıqaılap balaǵat aıtqany úshin «Jetisý» fýtbol klýbyna 100 AEK kóleminde aıyppul salyndy.

Bıylǵy Premer-lıga klýbtary arasynda fýtboldan Qazaqstan chempıonatynda oıyn translıatsııasyn úzgeni úshin, sondaı-aq match kezinde pırotehnıkalyq quraldardy paıdalanǵan kórermenderiniń orynsyz qylyǵy úshin «Aqtóbe» FK 100 AEK aıyppul tóleıtin boldy.

«Elim-aı» jáne «Arysqa» eki oıynshysynyń matchtan alastatylǵany úshin, al «Jeńiske» bes birdeı oıynshysynyń eskertý alýyna baılanysty 50 AEK aıyppul salyndy.

Match kezinde «Kaspııdiń» jankúıerleri «Rahmet» komandasynyń qaqpashysyna bógde zattar laqtyrǵan. Osyǵan baılanysty «Kaspıı» komandasy 50 AEK tóleıdi.

Al «Turan» FK-ǵa tártiptik reglamenttiń 66-babyna sáıkes 500 AEK mólsherinde aıyppul salyndy. Osy bapqa sáıkes 500 AEK aıyppuldy «Qyzyljar» klýby da arqalady.

Atalǵan klýbtar tıisti somany 6 mamyrǵa deıin tóleýi tıis.

Sondaı-aq, qaýipti dóreki oıyny úshin «Elim-aı» komandasynyń oıynshysy Narbı M. úsh matchqa oıynnan shettetiledi. Dıskvalıfıkatsııa merzimi 1 sáýirden bastap esepteledi. Qarsylasyn gol soǵý múmkindiginen aıyrǵany úshin «Arys» komandasynyń oıynshysy M. Syrbaı da bir matchqa shettetildi, dıskvalıfıkatsııa merzimi - 26 naýryzdan bastap.