Janbota Aldabergenova: Armanym Olımpıada medali
Tórtkúl dúnıe kóz tigetin jahandyq jarys bastalmas buryn osy Olımpıadada frıstaıldyń akrobatıka túrinen el namysyn qorǵaıtyn Janbota Aldabergenovamen suhbattasýdyń sáti túsken edi. Sportshy osydan birer kún buryn Almatyǵa kelip, Qazaqstan quramasyn Olımpıadaǵa arnaıy shyǵaryp salý rásimine qatysqan bolatyn.
- Janbota Erkinqyzy, Olımpıadaǵa sanaýly kúnder ǵana qaldy. Qandaı kóńil kúıdesiz?
- Kóńil kúıim óte jaqsy. Olımpıada jaqyndaǵan saıyn taǵatsyzdana kútip júrmin. 2017 jyly aqpan aıy men úshin sátti bastalǵan edi. Ózderińiz de bilesizder, byltyrǵy jyly osy ýaqytta ásem qalamyz Almatyda ótetin Dúnıejúzilik Ýnıversıada oıyndaryna qyzý daıyndyq júrip jatqan edi. Mine, bıyl Olımpıada oıyndaryna qyzý daıyndalyp jatyrmyz. Ýnıversıada jekeleı synda bir qola medalǵa qol jetkizsem, araǵa bir kún salyp, komandamyzben birge altyn júldeni utyp aldyq. Dúnıejúzilik Ýnıversıada oıyndary da týra apqan aıynyń basynda bastaldy. Mine, Olımpıada oıyndary da týra sol ýaqytta ótkeli otyr. Ótken jyly aqpan aıy qalaı jemisti bolsa, bıylǵy aqpan aıy da sondaı jemisti bolsa eken dep tilep júrmin.
- Demek, bıyl da aqpan aıynda sol jetistikterdi qaıtalasam deısiz ǵoı...
- Árıne, solaı bolyp jatsa, el senimi aqtalatyn, aqtúıeniń qaryny jarylatyn qutty aı bolar edi. Sebebi, basty maqsatym, ıaǵnı armanym - Olımıada medali. Olımpıada aıy sportshylarymyzǵa sáttilik ákelsin dep tileı berińizder.
- Osy Olımpıadaǵa joldama alýdyń ózi úlken eńbekti qajet etedi. Siz qandaı bıikterdi baǵyndyryp, basty dodaǵa qatysýǵa múmkindik aldyńyz?
- Biz bir ǵana álem chempıonatyna nemese álem kýbogyna ǵana qatysyp, joldamaǵa qol jetkize almaımyz. Osy mártebege jetý úshin bir jyl boıy álem kýbogyna qatysyp, barlyq kezeńderdegi nátıjemizdiń jalpy qorytyndysy boıynsha iriktelemiz. Sondaqtan ár kezeń biz úshin mańyzdy.
- Ol álem kýbogy qansha kezeńnen turady? Siz nesheýine qatystyńyz?
- Jalpy, alty kezeńnen turady. Men sonyń bes kezeńine qatysyp, Olımpıadaǵa joldama aldym.
- Qazir qaıda jattyǵyp jatyrsyz? Daıyndyǵyńyz qalaı?
- Daıyndyǵym óte jaqsy. Biz úshin álem kýbogynyń ár kezeńi úlken jattyǵý. Sondyqtan kóbinde ár elde, ár túrli taý betkeılerinde jattyǵamyz. Qazir sońǵy daıyndyǵymdy Reseıde ótkizip jatyrmyn. Bul joly Almatyǵa birer kúnge Olımpıadaǵa arnalǵan kıim-keshegimdi alyp ketýge kelgen bolatynmyn. Sońǵy jattyǵýymdy Reseıde jalǵastyryp, aqpannyń basynda Olımpıadaǵa jol tartamyn.
- Olımpıadada qaı eldiń sportshylaryn basty qarsylas dep sanaısyz?
- Qansha elden sportshy keledi, sonyń barlyǵy bizge qarsylas. Sonyń ishinde Qytaı, Reseı, Belarýs jáne jarys qojaıyndary osy Olımpıadadaǵy eń basty qarsylastar dep aıtýǵa bolady.
- Bul sizdiń birinshi Olımpıadańyz emes. Sochıde 6-shy orynǵa qol jetkizgenińizdi jaqsy bilemiz. Ekinshi ret qatysqaly otyrǵan basty dodada jeńis tuǵyryna kóterilýge múmkindigińizdi baǵalap kórdińiz be?
- Barlyǵy bir Allanyń qolynda. Baǵym men babym qatar shaýyp jatsa, nege medal almasqa?! Bar sportshynyń armany Olımpıadada medal alý. Sol baqyttyń dámin tatý meniń de armanym. Bıyl bar kúshimdi jınap, bıikten kórinýge tyrysam.
- Endi, keri sheginip, qary juqa túsetin Ońtústik óńirinen osy sport túrine qalaı kelgenińizdi esińizge túsire ketseńiz?
- Meniń bul sportqa kelýime 2011 jyly Almaty men Astanada ótken Qysqy Azıada oıyndary basty sebep boldy. Sol baıraqty básekede sporttyń osy túrin telearnadan kórip, qatty qyzyqtym. Keıin ýaqyt joǵaltpaı osy sport túrine baryp baq synap kórýdi jón sanadym. Qyzyǵýshylyǵymmen tabandylyǵymnyń arqasynda meńgerip alyp, ary qaraı jalǵastyryp kettim. Sonyń nátıjesi mine, ekinshi Olımpıadama attanǵaly otyrmyn. Kóptegen dodalarda júldeli boldym.
- Bul sport sizdi nesimen qyzyqtyrdy? Qazaqtyń qarapaıym názik qyzdaryna aspanda qalyqtap, shyr kóbelek aınalyp sekirý qorqynyshty bolǵan joq pa?
- Ár sporttyń ózindiń qıyndyǵy bar. Bar ynta-jigerińmen berile kirisken isten nátıje bolady eken. Eń bastysy - júrektilik, batyldyq, tabandylyq kerek.
- Frıstaılǵa deıin nemen aınalystyńyz?
- Sporttyq gımnastıkamen aınalystym. Keıin bul sport túrinen maqsatyma jete almaıtynymdy anyq baıqadym. Sosyn frıstaıldy tańdadym.
- Sporttyq gımnastıkadan qandaı jetistikterge qol jetkizdińiz?
- Sport sheberi ataǵyna ıe boldym.
-Áńgimeńizge rahmet! Olımıadada júldeli bolýyńyzǵa tilektespiz.
