Jánibek Álimhanuly: Men árqashan taza sportty qoldaımyn
ASTANA.KAZINFORM - WBO jáne IBF tujyrymdary boıynsha orta salmaqtaǵy álem chempıony Jánibek Álimhanuly dopıng daýyna qatysty óz pikirin aıtty.
Boksshy árqashan taza sportty qoldaıtynyn, qaıta analız tapsyratynyn aıtty.
- Men árqashan taza sportty qoldaımyn. Muny jaqsy bilesizder. Men taza sportty nasıhattap júrgenimdi de bilesizder. Jańalyqty oqyp tańǵalyp otyrmyn. VADA birinshi ret analız alyp, bári taza dep edi. Men vıtamınderime de, tamaǵyma da eshqandaı ózgeris engizbedim. Ekinshi ret testte nege mundaı bolǵanyn túsinbeı otynmyn, biz qaıta analız tapsyrýǵa ótinish aıttyq. Jaýabyn kútip otyrmyz! - dedi boksshy instagram paraqshasynda.
Aıta keteıik, tanymal «The Ring magazine» kásipqoı boks basylymy Jánibek Álimhanulynyń VADA synamasy oń nátıje kórsetkenin habarlaǵan edi.
Qazaqstandyq boksshy osy jeksenbi kúni AQSh-tyń Tehas shtatynda Erıslandı Laramen orta salmaqtaǵy WBO, IBF jáne WBA belbeýleri úshin birikken tıtýldyq jekpe-jek ótkizedi dep josparlanǵan bolatyn.