Janarmaı satýdan túsken qosymsha tabystyń 80 paıyzy bıýdjetke baǵyttalmaq

ASTANA. KAZINFORM – Janarmaı satýdan túsken qosymsha tabystyń 80 paıyzy bıýdjetke baǵyttalmaq. Mundaı ózgeris Ulttyq ekonomıka mınıstrligi ázirlegen Úkimet qaýlysyna ózgerister jobasynda kózdelgen.

Qujat janar-jaǵarmaı baǵasyna memlekettik retteýdi alyp tastaǵan jaǵdaıda janarmaı óndirýshiler men satýshylardyń qosymsha marjınaldylyǵynyń 80 paıyzyn bıýdjetke baǵyttaý maqsatynda benzınge (avıatsııalyqty qospaǵanda) jáne dızel otynyna qosymsha aktsızdiń mólsherlemesin belgileýdi kózdeıdi.

Osylaısha, shara janarmaı satýdan túsken qosymsha tabystyń 80 paıyzyn bıýdjetke qaıta bólýge múmkindik beredi. Bul rette qosymsha aktsızder aǵymdaǵy deńgeıden baǵalar ósken kezde ǵana paıda bolady.

Aıta keteıik, Ulttyq ekonomıka mınıstrliginiń «Benzınge (avıatsııalyq benzındi qospaǵanda), dızel otynyna, gazoholǵa, benzanolǵa, munaı eritkishine, jeńil kómirsýtekter qospasyna jáne ekologııalyq otynǵa arnalǵan aktsızder mólsherlemelerin bekitý týraly» Qazaqstan Respýblıkasy Úkimetiniń 2018 jylǵy 6 sáýirdegi №173 qaýlysyna ózgeris engizetin qaýly jobasy ashyq NQA portalynda jarııalandy. Qaýly jobasy 18 aqpanǵa deıin qoǵamdyq talqylaýda bolady.

Aıta keteıik, Kólik mınıstri Marat Qarabaev Úkimet otyrysynan keıin ótken baspasóz máslıhatynda qosylǵan qun salyǵyn kóterý bastamasy men janarmaı baǵasynyń naryqqa berilýi taksı baǵasyna qalaı áser etetini týraly pikir bildirdi.