Janar-jaǵarmaıdyń jasandy tapshylyǵy bola ma dep alańdaımyn - Murat Ergeshbaev

ASTANA. KAZINFORM – Elimizdegi munaı óńdeý jumystary irkilissiz jumys istese, janar-jaǵarmaı tapshylyǵy bolmaıdy. Bul týraly BIZDIÑ ORTA podkastynda Májilis depýtaty Murat Ergeshbaev aıtty.

- Bizde janar-jaǵarmaı tapshy ekeni belgili. Kórshi Reseıde geosaıasatqa baılanysty biraz munaı óńdeý zaýytynyń isten shyǵýy bizge qatty áser etedi. Olardyń ózderi de Qytaıdan janar-jaǵarmaı alý úshin kelissóz júrgizip jatyr, - dedi Murat Ergeshbaev.

Osy oraıda Májilis depýtaty elimizde qansha tonna munaı óndirilgeni, odan qansha tonna janar-jaǵarmaı alynǵany ári benzınniń qaı túrine suranystyń joǵary ekendigi belgili ekenin aıtady. Sondaı-aq ol otandyq naryqta tapshylyq baıqalsa Qytaımen de kelissóz júrgizý múmkindigi bar ekenine nazar aýdartady.

- Tek Reseımen ǵana emes, Qytaımen de kelissóz júrgizýge bolady. Degenmen, naryqta jasandy tapshylyq jasalýy múmkin dep alańdaımyn. Mysaly, «munaı óńdeı almaımyz, zaýyt 1 aptaǵa turyp qaldy» deı me dep qorqamyn. Eger mundaı jaıt bolmasa, onda ózimizdi janar-jaǵarmaımen qamtamasyz etýge bolady. Munaı eksportyn azaıtyp, otandyq zaýyttarǵa óńdeýge berý kerek, - dedi ol.

Aıta keteıik, Soltústik Qazaqstan oblysynda janarmaı qory eki aılyq normadan asady.