Jańaózende synyptastary 11 synyp oqýshysyn aıamaı uryp, soqqyǵa jyqqan

AQTAÝ. KAZINFORM — Oqıǵa keshkisin zardap shekken balanyń úıiniń janynda bolǵan. Buzaqylar kómekke kelgen oqýshynyń ákesin de kúsh kórsetip, aıaǵyn syndyrǵan.

Aıta keteıik, oqýshylar Jańaózen qalasyndaǵy «Bilim-ınnovatsııa» lıtseıinde oqıdy. Bul oqıǵa synyptastar arasyndaǵy túsinispeýshiliktiń saldary bolýy múmkin. Óıtkeni, taıaq jegen oqýshy sheteldik joǵary oqý ornyna grant jeńip alǵan. 

Jańaózen qalalyq aýrýhanasynyń bas dárigeri Marat Qaıyrǵalıulynyń aıtýynsha, zardap shekken áke men bala qazir aýrýhanada. Jaǵdaılary jaqsy.

Al, polıtsııa osy oqıǵaǵa qatysty qylmystyq is qozǵady. Buzaqylar anyqtalyp, ata-analarymen birge bólimshege jetkizilgen.

— Janjaldyń barlyq qatysýshylary anyqtaldy. Qylmystyq is qozǵalyp, qajetti tergeý áreketteri júrgizilip jatyr. Kámeletke tolmaǵandardyń quqyqtaryn qorǵaý jónindegi komıssııaǵa jiberý úshin materıaldar daıyndalyp jatyr. Quqyq buzýshylardyń ata-analarynyń nemese zańdy ókilderiniń jaýapkershiligi máselesi qaralatyn bolady. Barlyq kináliler profılaktıkalyq esepke alynady, — deıdi Mańǵystaý oblystyq polıtsııa departamentiniń baspasóz hatshysy Áıgerim Ibatýllaeva. 

Oblystyq bilim basqarmasynyń habarlaýynsha, zardap shekken oqýshyǵa psıhologııalyq qoldaý kórsetilip jatyr.

— Atalǵan oqıǵa 2025 jylǵy 17 sáýir kúni mektepten tys jerde, joǵary synyp oqýshylary arasynda bolǵan. Bir oqýshy aýrýhanaǵa jetkizilip, tıisti em shara qabyldap jatyr. Qazirgi ýaqytta oqýshynyń jaǵdaıy qanaǵattanarlyq, ómirine qaýip tónip turǵan joq. Sonymen qatar oǵan jan-jaqty psıhologııalyq qoldaý kórsetilip jatyr. Lıtseı ákimshiligi oqýshylardyń ata-analarymen túsindirý jumystaryn júrgizip, profılaktıkalyq keńes ótkizip, oqýshylar mektepshilik esepke alyndy, — delingen habarlamada. 

Buǵan deıin, Mańǵystaýda Beıneý aýdanynda 11-synyp oqýshysy kisi qolynan qaza tapqanyn jazǵan edik.