Jańaózende qarý satqan 2 adam sottaldy

JAŃAÓZEN. QazAqparat – Jańaózende qarý daıyndaýmen jáne satýmen aınalysatyn qylmystyq topqa qatysty sot protsesi ótti. Bul týraly QazAqparat UQK silteme jasap habarlaıdy.

Jańaózen aýdandyq sotynyń sheshimimen aımaqtyń turǵyndary «B» jáne «N» tıisinshe 5 jáne 4 jylǵa bas bostandyǵynan aıyryldy.

«Qylmystyq bıznesteri qarqyndy júrgen toptyń áleýmettik jelilerde keń taralǵan klıenttik bazasy bolǵan. UQK ýaqtyly qabyldaǵan sharalarynyń nátıjesinde olardyń qylmystyq áreketteriniń joly kesildi. Operatsııa barysynda 4 jaýyngerlik «Kalashnıkov» avtomaty, ózdiginen oqtalatyn 1 «Sımonov» karabıni jáne 48 oq-dári tárkilendi», - delingen habarlamada.

Aıta ketsek, UQK Mańǵystaý oblysy boıynsha departamenti naýryz aıynda qarý-jaraq daıyndaıtyn jasyryn tsehty joıý boıynsha arnaıy operatsııa júrgizgen bolatyn. Qylmyskerler tehnıkalyq jóndeý ortalyǵynda tapsyryspen atylmaıtyn qarýdy jaýyngerlik qarýǵa aınaldyrǵan.