Jańalyqtar men jasandy ıntellekt bolashaǵy: Másele durys tepe-teńdik tabýda
ASTANA. KAZINFORM — II Ortalyq Azııa medıaforýmynda «Jasandy ıntellekt pen úlken derekter dáýirindegi medıanyń tsıfrlyq transformatsııasy» sessııasynda halyqaralyq medıa salasynyń tanymal sarapshylary JI-diń jýrnalıstıka men aqparattyq saıasatty retteýge áserin talqylady.
CNN telearnasynyń kreatıvti dırektory Ien Makdonald qazirgi medıakeńistiktiń evolıýtsııasyn uzaqqa sozylǵan, sonymen birge qarqyndy údep kele jatqan protsess retinde sıpattady.
— Transformatsııa — medıada óte aýqymdy maǵynaǵa ıe. Biz bul protsesten keminde 20 jyldan beri ótip kele jatqan sııaqtymyz, biraq ózgeris qarqyny, ásirese JI yqpalymen sońǵy 4-5 jylda aıtarlyqtaı artty, — dedi CNN kreatıvti dırektory.
Kreatıvti jáne tehnologııalyq toptarmen jumys isteıtin I. Makdonald generatıvti jasandy ıntellekttiń, ásirese jarnama men kontent óndirisindegi yqpalynyń artyp kele jatqanyn atap ótti.
Alaıda ol jańalyqtarǵa qatysty áńgime qozǵalǵanda kómekshi JI men generatıvti JI-di naqty ajyratý mańyzdy ekenin basa aıtty. Ol jýrnalıstıkanyń basty qundylyqtaryna — adamnyń qatysýyna jáne senim men shynaıylyqqa nuqsan keltirýi múmkin ekenin eskertti.
Tehnologııa men jaýapkershilik týraly pikirtalasta medıaquqyq salasynyń mamany doktor Venkat Aıer tsıfrlyq platformalardy retteýdiń zańdyq jáne etıkalyq qıyndyqtary baryn aıtty.
Doktor Venkat retteýdiń qajetti ekenin moıyndaı otyryp, negizgi bostandyqtardyń shektelmeýi kerektigin eskertti.
— Eger shamadan tys retteý jasalsa, mańyzdy negizgi múddelerge, ásirese, sóz bostandyǵyna zııan kelýi múmkin — dedi ol.
Medıa quqyǵy boıynsha sarapshy asyǵys zańnamalardan saq bolý qajettigin eskertti jáne teńgerimdi tásil ustanýdyń mańyzdylyǵyn atap ótti.
— Másele — durys tepe-teńdik tabýda, alaıda bul árdaıym júzege asa bermeıdi. Onyń sebepteri ártúrli bolýy múmkin — saıası, ıdeologııalyq, keıde ekonomıkalyq. Al qazir tehnologııa da úlken synǵa aınalyp otyr, — dedi doktor Venkat.
Doktor Aıer halyqaralyq retteýdiń tıimdiligi shekteýli ekenin de atap ótti, sebebi egemendik qaǵıdatyna baılanysty negizgi retteýshi bılik ulttyq deńgeıde qalyp otyr. Ol halyqaralyq quqyqtyń ishki saıasatty aıqyndaýyna kelise qoıatyn elderdiń az ekenin aıtty. Degenmen, spıker halyqaralyq dıalog pen yntymaqtastyqtyń áli de múmkin ekenin, biraq tek erikti negizde ǵana júzege asatynyn basa aıtty.
Aıta keteıik, 16-17 sáýir kúnderi Ortalyq Azııa boıynsha medıa salasynyń mamandary Astanadaǵy forýmda bas qosty. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysty.
Ortalyq Azııa elderiniń óńirdegi aqparattyq yntymaqtastyǵyn nyǵaıtý úshin ortaq telearna qurý bastamasy kóterildi.