Jańadan qurylatyn Abaı oblysy máslıhatynyń depýtattyq quramy bekitildi
2015-2022 jyldar aralyǵynda Abaı aımaǵyn damytýǵa 200 mlrd teńge jumsalǵan. Bul týraly ShQO ákimi Danıal Ahmetov oblystyq máslıhattyń XVI kezekten tys sessııasynda aıtty.
«Memleket basshysy Qasym-Jomart Toqaevtyń Jarlyǵymen 8 maýsymda Shyǵys Qazaqstan oblysynyń quramynan Aqsýat, Abaı, Aıagóz, Besqaraǵaı, Borodýlıha, Jarma, Úrjar, Kókpekti aýdandary, Semeı jáne Kýrchatov qalalary bólinedi. Osylaısha, ákimshilik ortalyǵy Semeı qalasy bolatyn Abaı oblysy qurylady. Óńirde aldaǵy ózgeristerge belsendi daıyndyq júrip jatyr», - dedi aımaq basshysy.
Máselen, Shyǵys Qazaqstan oblysy máslıhatynyń sessııasynda depýtattyq korpýsty bólý jónindegi sheshimniń jobasy maquldandy. Jańa oblys máslıhatynyń depýtattyq quramyna 16 adam bekitildi. 8 maýsymda Semeı qalasynda Abaı oblysy máslıhatynyń otyrysy josparlanǵan.
«Sońǵy 7 jylda Abaı oblysynyń qalalary men aýdandaryna 2,1 trıllıon teńge ınvestıtsııalandy. Birqatar iri joba júzege asyryldy. Atap aıtqanda, 2017 jyly salynǵan biregeı Aqtoǵaı taý-ken baıytý kombınaty men qýattylyǵy 300 myń tonnadan asatyn maı óńdeıtin iri zaýyt qurylysy», - dedi Danıal Ahmetov.
