Janabylovtarda qylmystyq isten qutylatyn bir múmkindik boldy – agenttik

ASTANA. KAZINFORM – Bloger Erbolat Janabylov pen onyń jubaıy Elmıra Tólegenova ákimshilik quqyqbuzýshylyq boıynsha taǵylǵan aıyppen kelisse, qylmystyq jaýapkershilikten qutylýy múmkin edi. Bul týraly QR Qarjylyq monıtorıng agenttigi tóraǵasynyń orynbasary Jeńis Elemesov aıtyp berdi.

Onyń aıtýynsha, eger blogerler ózderine taǵylǵan ákimshilik quqyqbuzýshylyqty moıyndaǵanda, olarǵa tek aıyppul túrindegi ákimshilik jaza qoldanylar edi.

– Ákimshilik quqyq buzýshylyq týraly kodekste naqty jazylǵan: eger adam ákimshilik jaýapkershilikke tartylýǵa qarsy bolyp, tıisti ótinish bildirse, onda is ýákiletti organda emes, sotta qaralady. Mysaly, Justking31 (Nurtaza Nurbek) ózine qatysty ákimshilik quqyq buzýshylyqpen kelisti, hattama toltyrylyp, qaýly shyǵaryldy jáne ol aıyppul túrinde ákimshilik jaýapqa tartyldy. Aıyppuldar tólendi. Al Janabylov pen onyń jubaıy buzýshylyqty moıyndaýdan bas tartyp, ótinish bergen. Sonyń nátıjesinde is sotqa joldandy, al sot protsesi barysynda qylmystyq jazalanatyn áreket belgileriniń bar ekenin anyqtaýǵa negiz bolǵan basqa da faktiler anyqtalǵan bolýy múmkin, – dedi Jeńis Elemesov Senattaǵy brıfıng barysynda.

Aıta keteıik, endi blogerlerdiń lotereıa ótkizýi qylmystyq sanatqa aýystyrylady.

Osy aptada 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovaǵa qatysty qylmystyq is qozǵaldy.

Májilis depýtattary da bir úıdi utysqa salyp, 1,5 mlrd teńge paıda tabatyn blogerler keısin Qylmystyq kodeks arqyly qarastyrýdy usynyp otyr.