Jańa jyldyq keshke barardyń aldynda oılanǵan jón – Aıjan Esmaǵambetova

NUR-SULTAN. QazAqparat - QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova jańajyldyq oıyn-saýyq ótkizýge qatysty pikir bildirdi, dep habarlaıdy QazAqparat tilshisi.

«Epıdjaǵdaıdyń oń nemese teris baǵyt alýy árqaısysymyzǵa qatysty. Іndetten saqtaný talaptaryn oryndamasaq jaǵdaı qazir-aq ózgeredi. Birinshi kezekti koronavırýsqa qarsy vaktsına alýymyz kerek, al vaktsına alǵan jaǵdaıda karantın talaptaryn saqtaýymyz qajet. Maska taǵý, áleýmettik qashyqtyqty saqtaý áli óz kúshinde. Onyń ústine aldymyzda mereke jáne birneshe kúndik demalys kele jatyr. Jańa jyldyq keshke barardyń aldynda oılanǵan jón. Vırýs áli joıylǵan joq, kerisinshe onyń jańa túrleri paıda bolyp jatyr», - dedi A. Esmaǵambetova Úkimet úıinde tilshilerdiń suraǵyna jaýap bere turyp.

Onyń aıtýynsha, qazirgi ýaqytta elde epıdjaǵdaı turaqtalyp, indet juqtyrý azaıyp keledi.

«Búkil álem aıtyp jatqan «omıkron» týraly áli kúnge deıin naqty bir derek joq. Bizdiń basty qarý ol saqtaný, aldyn alý. Sondyqtan jańa jyldyq oıyn-saýyqqa barar aldynda taǵy bir oılanaıyq, barǵannyń ózinde vırýstan saqtaný sharasy týraly umytpaǵanymyz abzal. Búgingi tańda koronovırýs boıynsha álemdegi jaǵdaı qıyn, al bizdiń elimizde jaǵdaı rettelip keledi», - deıdi ol.