Fınaldar, shoý jáne merekelik keshter: Jańa jyldyq kóńil kúı «Habardan» bastalady
ASTANA. KAZINFORM — Erteńnen bastap «Habar» telearnasynda naǵyz merekelik qarbalas bastalady. Kórermendi birinen soń biri qyzyqty fınaldar, aýqymdy shoý, tanymal juldyzdar men kóterińki kóńil kúı kútip tur. Jańa jyldyq marafon 27 jeltoqsanda bastalyp, 4 qańtarǵa deıin jalǵasady.
Merekelik efırdiń alǵashqy kúni-aq tartysqa toly bolmaq. Saǵat 10:00–de «Sheberler shaıqasy» realıtı-shoýynyń alǵashqy maýsymy aıaqtalady. Birneshe aı boıy dánekerleýshi, qurylysshy, aspaz, avtoslesar men aǵash sheberleri ózara baq synap, shynaıy eńbekke jaqyn tapsyrmalardy oryndady. Bul joba kórermenge tek saıysty emes, qarapaıym eńbek adamdarynyń minezi men ómirge degen kózqarasyn kórsetti. Fınalda bes myqty sheber jeńis úshin sońǵy ret kúsh synasady.
Al saǵat 20:00–de kórermen kópten kútken «The Voice Qazaqstan» fınalyn tamashalaıdy. Bul joly jaı ǵana án aıtý emes, úlken sahnalyq shoý usynylady. Jandy mýzyka, bı, erekshe qoıylymdar men kútpegen dýetter fınaldy naǵyz talanttar sherýine aınaldyrmaq. Ár fınalıst óz ónerin barynsha ashyp kórsetýge múmkindik alady.
31 jeltoqsan kúni saǵat 20:00–de «Qyzyq premııa» kórermendi kúlkige qaryq qylyp, eski jyldy kóńildi kúıde shyǵaryp salady. Baǵdarlamany Marat Oralǵazın men Erkebulan Myrzabek júrgizip, jyl boıy el nazarynda bolǵan túrli keıipkerlerdi stýdııaǵa jınaıdy. Kim qaı atalymǵa ıe bolatyny efır kezinde ǵana belgili bolady. Sondyqtan qyzyq ta, kútpegen sátter de sońyna deıin saqtalady.
Al Jańa jyl túni saǵat 22:00–de «Ǵajaıyp tún» bastalady. Bir sahnada 45-ten astam qazaqstandyq ónerpaz bas qosyp, súıikti ánderin oryndaıdy. Roza Rymbaevadan bastap, jas oryndaýshylarǵa deıingi juldyzdar kórermenge merekelik kóńil kúı syılaıdy. Kesh júrgizýshileri de — elge tanymal, kórermenge júzi tanys tulǵalar.
Mereke munymen bitpeıdi. Qańtardyń alǵashqy kúnderi «Habar» efırinen tanymal ánshilerdiń merekelik keshteri men otbasymen birge kórýge arnalǵan fılmder kórsetiledi.
Jańa jyldy úıde, jyly atmosferada qarsy alǵyńyz kelse — teledıdardy «Habarǵa» qosyńyz. Árqashan Habarda Bolaıyq!