Jańa jyldan bastap elde qujattardy rásimdeý quny qanshalyqty ózgeredi

ASTANA. KAZINFORM — Qazaqstanda 2026 jylǵy 1 qańtardan bastap aılyq eseptik kórsetkishtiń (AEK) ósýine baılanysty birqatar qujattardy rásimdeý quny qymbattaıdy. 

— 2025 jylǵy 8 jeltoqsanda qabyldanǵan «2026–2028 jyldarǵa arnalǵan respýblıkalyq bıýdjet týraly» zańǵa sáıkes, 2026 jyly AEK mólsheri 4 325 teńge bolyp belgilendi. Al 2025 jyly bul kórsetkish 3 932 teńge bolǵan. Osyǵan baılanysty memlekettik baj mólsheri de ósedi, — delingen qujatta.

Atap aıtqanda, 36 betten turatyn qarapaıym pasportty rásimdeý quny 8 AEK (34 600 teńge). 2025 jyly bul qyzmet 31 456 teńge bolǵan. Sondaı-aq 48 betten turatyn pasport úshin 12 AEK (51 900 teńge) tóleý qajet, al 2025 jyly onyń quny 47 184 teńge boldy. Balalar pasporty 4 AEK-ke (17 300 teńge) teń. 2025 jyly bul kórsetkish 15 728 teńge bolǵan.

Sonymen qatar jeke kýálikti alǵash ret alý jáne merzimi aıaqtalýyna baılanysty aýystyrý tegin bolyp qala beredi. Alaıda jeke kýálik joǵalǵan jaǵdaıda ony qalpyna keltirý úshin 0,2 AEK (865 teńge) tóleý qajet. Eger jeke kýálik ekinshi ret joǵalsa, memlekettik baj mólsheri 1 AEK — 4 325 teńge. Al júrgizýshi kýáligin rásimdeý quny 1,25 AEK bolady, ıaǵnı 5 406 teńge.

Sondaı-aq nekeni tirkeý de qymbattaıdy. Neke týraly kýálik úshin 1 AEK — 4 325 teńge tóleý qajet. Al nekeni buzý úshin alynatyn memlekettik baj 2 AEK, ıaǵnı 8 650 teńge, al 2025 jyly bul soma 7 864 teńge bolǵan. Týý týraly kýálik burynǵydaı tegin beriledi. Degenmen, ol joǵalǵan jaǵdaıda qujatty qaıta alý úshin 0,5 AEK — 2 163 teńge tóleý talap etiledi.

Buǵan deıin jańa jyldan bastap Qazaqstanda aılyq eseptik kórsetkish (AEK) 4 325 teńge bolady. Bul birneshe tólemniń mólsherine áser etedi. Kazinform tilshisi járdemaqy, memlekettik baj jáne eń jıi kezdesetin quqyq buzý boıynsha aıyppuldyń qanshalyqty ósetinin eseptep shyqqan edi.