Jańa ulttyq joba 40 mlrd dollardy qajet etýi múmkin - Oljas Qudaıbergenov
ASTANA. KAZINFORM – CSI konsaltıngtik kompanııasynyń aǵa seriktesi, ekonomıst Oljas Qudaıbergenov Prezıdenttiń Qazaqstan halqyna Joldaýynda aıtqan jańa ulttyq jobanyń qansha turatynyn aıtty. Onyń aıtýynsha, JEO men eldiń kommýnaldyq nysandaryn jańǵyrtý shamamen 40 mlrd dollardy qajet etýi múmkin.
Oljas Qudaıbergenov energııa sektoryn jańartý ıdeıasy Memleket basshysynyń bıylǵy joldaýyndaǵy basty ekonomıkalyq shara ekenin atady. Onyń aıtýynsha, Qazaqstannyń energetıkalyq jáne kommýnaldyq ınfraqurylymy ábden tozǵan, sondyqtan da apattardyń qaıtalaný qaýpi bar. Osyǵan oraı Úkimet jyl sońyna deıin aldaǵy bes jylǵa arnalǵan ulttyq jobany ázirlep, bekitýi kerek.
«Jańǵyrtýǵa arnalǵan ınvestıtsııalar» sheńberinde uzaq merzimdi tarıf bolady, bul barlyq jobalardy ınvestorlar men kredıtorlar úshin qyzyqty etýge múmkindik beredi. Jalpy, bizdiń esepteýimiz boıynsha búkil sektordy jańǵyrtýǵa shamamen 40 mlrd dollar qajet, biraq túpkilikti kórsetkishti ulttyq joba aıqyndaıdy», - deıdi ol.
Sarapshy atap ótkendeı, qazirgi Premer-Mınıstr Oljas Bektenov qazaqstandyq tutynýshylyqty jaqtaıdy, sondyqtan bul otandyq óndirýshilerdiń damýyna áser etýi múmkin. Mundaı jaǵdaı óz kezeginde halyqtyń jumyspen qamtylýyna jáne ekonomıkalyq ósýge septigin tıgizedi.
Ekonomıst Prezıdenttiń ekinshi mańyzdy tapsyrmasy retinde únemdeý turǵysynan mańyzdylyǵy boıynsha aqsha-nesıe saıasatyn bankter naqty sektordy nesıelendirýge belsendi qatysatyndaı etip teńestirýdi atady.
«Qazir ónerkásipke berilgen nesıeler kólemi JІÓ-niń 5%-dan tómen, bul óte az. Bankter kóp nárse isteı alady, biraq munda bankterdiń qyzyǵýshylyǵyn arttyrý úshin prýdentsıaldyq retteýdi ózgertý qajet», — dedi ol.
Sondaı-aq sarapshy salyq salasyn reformalaý jónindegi bastamaǵa da toqtaldy. Jańa kodeks kelesi jyly qabyldanady jáne ol qoǵamdyq daýlar men belgili bir ózgeristerdiń taqyrybyna aınalady. Bul turǵyda Qazaqstanda ońaılatýdan qoryqpaý kerek jáne neǵurlym batyl sheshimder qabyldaý qajet dep esepteıdi.
«2013 jyly men birinshi ret bólshek salyqty engizýdi bastadym. Alty jyl boıy qarsylasyp kelip, atalǵan ıdeıa tek 2019 jyly qoldaý tapty. Alaıda, salyq dızaıny burmalandy, tek 2023 jylǵa qaraı bólshek salyq men usynǵan qurylymǵa jaqyn boldy. Endi bólshek salyqty tek halyqqa qyzmet kórsetetin bıznes túrlerine shoǵyrlandyrǵan durys. Bul rette kirister boıynsha joǵarǵy shekti alyp tastaý kerek», - dedi ol.
Óz kezeginde, memlekettik basqarý sapasyn túbegeıli jaqsartý bıýrokratııanyń qysqarýyna jáne sheshim qabyldaýda memlekettik qyzmetshilerdiń derbestiginiń artýyna ákelýi múmkin.
«Qalǵan bastamalar da qyzyqty, olar salalyq nemese áleýmettik sıpatta. Osy bastamalardyń barlyǵy iske asyrylady dep úmittenemin. Durys jáne ýaqtyly iske asyrylǵan jaǵdaıda bul sharalar aldaǵy 5 jylda naqty ekonomıkalyq ósimniń 2%-dan 6%-ǵa deıingi qolda bar qarqynyna qosymsha múmkindik bere alady», - dedi sarapshy.
Ádiletti Qazaqstan: zań men tártip, ekonomıkalyq ósim, qoǵamdyq optımızm - Joldaýdyń tolyq mátini.
