Jańa Úkimet ekonomıka ósimin 6 paıyzǵa jetkizý úshin ne istemek
ASTANA. KAZINFORM – Premer-Mınıstrdiń orynbasary – Ulttyq ekonomıka mınıstri Nurlan Baıbazarov Qazaqstan ekonomıkasyn 6 paıyz ósimge shyǵarý úshin qandaı sharalar qabyldanatynyn aıtty.
«Jyldyń alǵashqy aıy tómen kórsetkishpen bastalyp otyr. Muny moıyndaý kerek. Al aldymyzda ekonomıkanyń kem degende 6 paıyz ósimin qamtamasyz etý mindeti tur. Ol úshin qandaı qosymsha sharalar qabyldanady?» dep surady Premer-Mınıstr Úkimet otyrysynda.
Mınıstr úsh salaǵa basa mán beriletinin aıtty.
«Eń birinshi memlekettik shyǵystardy tolyq ıgerýimiz kerek. Onyń ishinde basa nazar aýdaratyn sala — bıýdjettik ınvestıtsııany ıgerý jáne memlekettik satyp alýdy tolyq qamtamasyz etý. Bul jerde otandyq taýar óndirýshilerge basa nazar aýdarýymyz qajet. Ekinshiden, basty draıverler — qurylys, óńdeý ónerkásibi men kólik salalaryndaǵy ınvestıtsııalyq jobalardy qarqyn júzege asyrýymyz kerek. Taǵy bir rezerv — orta jáne shaǵyn bıznesti odan ári damytý. Bul jerde memlekettik qoldaý arqyly ekinshi deńgeıli bankterdiń 1 trln teńgeden asa aqshasyn jumyldyrý kózdelip otyr», — dedi ol.
Nurlan Baıbazarov negizgi kapıtalǵa salynatyn ınvestıtsııa kólemin 22 trln teńgeden túsirmeýge talpynatynyn aıtty.
«Sonymen qatar, „Báıterek“ jáne „Samuryq“ holdıngterinde iske asyp jatqan iri jobalar bar. Solardy ıgerýimiz kerek. Olarda bos rezerv aqsha bar. Sony biz qarastyryp jatqan jańa jobalarǵa baǵyttaý kerek. Bul jerde úlken jumys bar. Negizgi kapıtalǵa salynatyn ınvestıtsııa 22 trln teńgeden kem bolmaýy kerek. Bul jerde bizge kómektesetin taǵy bir faktor — shetelden keletin tikeleı ınvestıtsııa. Munyń deńgeıin 25 mlrd dollardan túsirmeýimiz kerek. Osy aıtylǵan salalardyń bárinde oıdaǵydaı jumys istesek, 6 paıyz ósimdi qamtamasyz ete alamyz», — dedi vedomstvo basshysy.
