Jańa Salyq kodeksi: mindetti tólemderdiń sany qysqarady
ASTANA. KAZINFORM – Parlament Májilisiniń qaraýyna jańa Salyq kodeksiniń jobasy men ilispe qujat kelip tústi.
«Bul zań jobalary Qazaqstan Prezıdentiniń Qazaqstan halqyna Joldaýlarynda aıtylǵan tapsyrmalaryn oryndaý maqsatynda ázirlenip, Úkimettiń qaýlylarymen 2024 jylǵy 28 tamyzda Májiliske engizilgen bolatyn. Salyq kodeksiniń jobasy 822 baptan turady, sonymen qatar qoldanystaǵy Salyq kodeksi men ony qoldanysqa engizgen zańnyń kúshin joıady», - dedi Májilistiń Qarjy jáne bıýdjet komıtetiniń tóraǵasy Tatıana Saveleva palatanyń jalpy otyrysynda.
Kodeks jobasy aıasynda myna usynystar qamtylǵan:
- jekelegen salalardaǵy salyq tóleýshiler úshin korporatıvti tabys salyǵynyń mólsherlemesin saralaý;
- qaıta óńdeýdi damytý úshin salyq shegerimderin keńeıtý jáne jańǵyrtý úshin tabysty qaıta ınvestıtsııalaýdy yntalandyrý;
- salyqtar men bıýdjetke tólenetin basqa da mindetti tólemderdiń sanyn qysqartý;
- barlyq arnaýly salyq rejımderin ońtaılandyrý;
- salyq jeńildikterin berý monıtorıngi men taldaý tásilderin qaıta qaraý;
- sondaı-aq salyq salasynda ákimshilendirýdi jetildirýge yqpal etetin is-sharalar.
«Májilis komıteti bul zań jobalaryn talqylaýǵa alyp, olar boıynsha qorytyndy ázirleýge daıyn», - dedi T. Saveleva.
Budan buryn habarlanǵandaı, Qazaqstan halqyna Joldaýyn jarııalaý kezinde Memleket basshysy Qasym-Jomart Toqaev jańa Salyq kodeksin qabyldaý merzimin kelesi jylǵa aýystyrýǵa bolatynyn aıtty.
Bıyl maýsym aıynnyń aıaǵynda Qazaqstan Ulttyq ekonomıka mınıstrligi «Ashyq NQA» portalynda jańa Salyq kodeksiniń jobasy ornalastyrylǵanyn habarlady.
