Jańa Salyq kodeksi: kimder QQS-tan bosatylady
ASTANA. KAZINFORM — Búgin elordada jańa Salyq kodeksin túsindirýge arnalǵan semınarda Qarjy mınıstrligi Memlekettik kirister komıteti tóraǵasynyń orynbasary Jánibek Nurjanov QQS-tan bosatylatyn nysandarǵa qatysty túsinik berdi.
— QQS mólsherlemesi salyq salynatyn aınalymnyń 16% deńgeıinde belgilendi. Dárilik jáne medıtsınalyq zattar, sondaı-aq medıtsınalyq qyzmetter úshin QQS mólsherlemesi 2026 jyldyń 1 qańtarynan — 5%, 2027 jyldyń 1 qańtarynan 10% shamasynda qoıyldy. Sonymen qatar, tegin medıtsınalyq kómektiń kepildik berilgen kólemi jáne MÁMS aıasynda, sondaı-aq Úkimet aıqyndaıtyn tizbe boıynsha orfandyq jáne áleýmettik mańyzy bar aýrýlardy emdeý úshin dárilik zattardy ótkizý ári ımporttaý jáne medıtsınalyq qyzmetter QQS-tan bosatylady, — dedi Jánibek Nurjanov.
Onyń aıtýynsha, 2026 jyldan turǵyn úı-jaıdy (páterdi) satý nemese jalǵa berý kezinde QQS-tan bosatý joıylady. Bul rette, turǵyn úıler men úı-jaılardyń qurylysyn júzege asyratyn qurylysshylardyń saýda aınalymyna keler jyldan bastap salyq salynady. 2026 jyldyń 1 qańtaryna deıin bastalǵan qurylys nysandary úshin salyqtan bosatý ǵımarat tolyq ótkizilgenge deıin kúshinde bolady.
— Salyq kodeksinde QQS-tan bosatýdyń ózge de baǵyttary eskerilgen. Bul turǵyda ishki týrızm boıynsha týroperatordyń qyzmetterin qarastyrdyq. Qazir elimizde kirý týrızmi ǵana QQS-tan bosatylǵan. Munymen qosa, otandyq basylymnyń kitaptary, baspa túrinde kitaptar shyǵarý boıynsha qyzmetter, arheologııalyq jumystarynda osyndaı jeńildikter bar, — dedi vedomstvo ókili.
Budan bólek, arnaýly salyq rejımi qoldanylatyn taýarlardy, jumystardy, kórsetiletin qyzmetterdi ótkizý QQS boıynsha aınalym retinde sanalmaıdy.
Eske salsaq, bıyl shilde aıynda Memleket basshysy jańa Salyq kodeksine qol qoıdy.