Jańa perzenthana, tikushaq alańy: Astanadaǵy Shuǵyl medıtsına ortalyǵy qalaı jumys isteıdi
ASTANA. KAZINFORM – Astanadaǵy Ulttyq shuǵyl medıtsına ortalyǵy jyl basynan beri shetelde jaraqat alǵan 5 otandasymyzdy elge jetkizdi. Munyń bári Kepildik berilgen tegin medıtsınalyq kómek aıasynda tegin júrgiziledi. Sondaı-aq, Shuǵyl medıına ortalyǵy Astanada jańa korpýs ashyp, 29 baǵytta em-domdy bastap ketti jáne naýryz aıynan beri 3 myńǵa jýyq naýqasqa kezek kúttirmeıtin kómek kórsetip úlgergen.
Qandaı naýqastar elge tegin jetkiziledi
Ortalyqtyń basqarma tóraǵasy Erjan Ádilbekovtyń aıtýynsha, sanavıatsııa ushaǵy 4 aıda Mysyr, Túrkııa, Ońtústik Koreıa, Vetnam jáne Germanııadan aýyr haldegi bes qazaqstandyqty evakýatsııalaǵan.
− Jaqynda bizdiń mamandar Mysyrǵa reıs jasap, ınsýlt alǵan qazaqstandyq áıeldi elge jetkizdi. Ókinishke qaraı, keıde onkologııalyq aýrýlarǵa baılanysty azamattarymyz Koreıaǵa, Túrkııaǵa emdelýge ketedi. Týra sondaı sapaly em men zamanaýı jabdyqtar óz elimizde de bar. Astanadaǵy jańa onkologııalyq ortalyqta shetelden kem túspeıtin mamandar men jabdyqtar bar. Kóp jaǵdaıda olar 3-4 kezeńde, ıaǵnı asqynǵan jaǵdaıda óz qarajatymen barady. Al keıin jaǵdaıy kúrt nasharlap, qarajaty taýsylyp, bizge júginedi. Biz ondaı naýqastardy elge ákelýge tyrysamyz, − dedi E.Ádilbekov BAQ ókilderine arnalǵan baspasóz týrynda.
Bul rette shet elderden evakýatsııa naýqastyń qalaýymen emes, bekitilgen hattamaǵa sáıkes júrgiziledi. Túpkilikti sheshimdi medıtsınalyq komıssııa qabyldaıdy.
− Jalpy elimiz boıynsha 11 ushaq (AN-2) jáne 16 tikushaq (MI-8, Eurocopter-145) naýqastardy tasymaldap júr. Olar óńirlerde, aýdan ortalyqtarynan oblys ortalyqtaryna deıin ushady. Buǵan qosa, Astana men Almaty qalalarynda Pilatus PC-12 jáne ıAk-40 ushaqtary bar. Jyl saıyn qazaqstandyqtardy evakýatsııalaý úshin shetelge orta eseppen 10-15 reıs jasalady, − dedi ol.
Naýqastardy evakýatsııalaýdan bólek, sanıtarlyq avıatsııa jelisi arqyly transplantatsııaǵa arnalǵan aǵzalar men ony tasıtyn medıtsınalyq brıgadalar da tasymaldanady.
Jańa korpýs Astana perzenthanalarynyń júktemesin azaıtady
Bul naýqastar buryn ártúrli aýrýhanalarǵa ornalastyrylsa, qazir Shuǵyl medıtsına ortalyǵynyń jańa korpýsyna birden jetkiziledi. Jańa korpýs bıylǵy naýryz aıynda ashyldy. Munda shuǵyl kómektiń barlyq túri kórsetiledi, bul úshin jalpy hırýrgııa, akýsherlik, gınekologııa, ýrologııa, neırohırýrgııa, kardıologııa sekildi 9 klınıkalyq departament ashylyp, 29 túrli em-dom tizbesi bekitilgen.
− 17 naýryzdan beri 3 myńǵa jýyq naýqasqa kezek kúttirmeıtin kómek kórsetip úlgerdik. Qazir de jalpy 250 tósek-orynnyń 224-inde naýqastar jatyr. Qalǵan oryndardy keshe ǵana iske qosylǵan akýsherlik bólimge saqtap otyrmyz. Óıtkeni biz Astananyń jańa Nura aýdanyn tolyqqandy jedel járdem qyzmetimen qamtyp otyrmyz. Keshe ǵana akýsherlik bólimshemizge alǵashqy júkti áıel túsip, qazaq eline bir arý qosyldy. Bul tutas Astananyń perzenthanalaryna artylǵan júktemeni jeńildetedi, − dep túsindirdi ortalyq basshysy.
Jańa korpýs aldyńǵy qatarly medıtsınalyq jabdyqtarmen qamtylǵan: KT (256 keskin), MRT (3 tesla), angıograftar, ÝDZ apparattary jáne KINEVO 900 robotty hırýrgııalyq beıneleý júıesi bar. Ota jasaıtyn 12 zal da gıbrıdtelgen.
Ortalyq aýmaǵynda arnaıy tikushaq alańy men sanıtarlyq avıatsııa úshin angar ornalasqan, bul óńirlerden naýqastardy jedel jetkizýge múmkindik beredi. Búgingi kúnge deıin 2200-den astam áýe reısi oryndalyp, 44 myńnan astam naýqas tasymaldanǵan.
− Mysaly Jezqazǵan oblysynda bala bosanǵan áıeldiń jaǵdaıy asqynyp, búırekteri isten shyqqan edi. Ol dereý bizdiń ortalyqqa jetkizildi jáne eki aıǵa jýyq em qabyldady. Soltústik Qazaqstan oblysynda da jaqynda janarmaı beketinde jarylys bolyp, adamdardy kúıik shaldy. Olardyń bári bizdiń ortalyqta emdelip jatyr. ıAǵnı óńirlerde qajetti jabdyq pen maman jetispegen jaǵdaıda, adam ómiri tarazyǵa túskende bizdiń ortalyq kómektesedi, − deıdi dáriger.
Bul qyzmettiń bári qazaqstandyqtarǵa tegin kórsetilse, sheteldikter úshin aqyly. Basqa aqyly qyzmet alǵysy keletinderge de jaǵdaı jasalǵan. Osylaısha, naýryz aıynan beri 2,5 myń qazaqstandyq tegin emdelgen jáne 14 sheteldik jáne 28 adamǵa aqyly qyzmet kórsetilgen. Deı turǵanymen, shuǵyl medıtsınalyq kómektiń «Medıtsınalyq týrızmde» mańyzdy oryn alýy ekitalaı.
Sonymen birge, ǵımaratta Insýlt problemalary jónindegi respýblıkalyq úılestirý ortalyǵy jumys isteıdi. Olar mı qan aınalymy buzylǵan naýqastarǵa kómek kórsetýde ádisnamalyq jáne uıymdastyrýshylyq qoldaý kórsetedi.
Odan bólek, júrek yrǵaǵynyń buzylýyn dıagnostıkalaýǵa mamandandyrylǵan Júrek yrǵaǵy ortalyǵy, Shuǵyl kómek kórsetý boıynsha oqý-trenıng ortalyǵy, aýyr haldegi naýqastardy táýlik boıy baqylaıtyn telemedıtsına jáne Sıtýatsııalyq ortalyq jumys isteıdi.
Endi jedel járdem qyzmetteri bir ortalyqqa baǵynady
Ulttyq shuǵyl medıtsına ortalyǵynyń jańa korpýsy Qazaqstandaǵy barlyq jedel járdem qyzmetteriniń biryńǵaı basqarý júıesine birigýine yqpal etti.
− Buryn bul qyzmetter ár jerde jeke-dara jumys istegen bolsa, qazir biz jańa deńgeıge kóterildik. Endi bizde elimizdegi barlyq jedel járdem qyzmetin úılestirip otyratyn arnaıy úılestirý ortalyǵy ashyldy, − dedi Erjan Ádilbekov.
Onyń aıtýynsha, kúshterdi biriktirý nátıjesinde jedel járdem júıesine jańashyldyqtar engizilip jatyr. Sonyń ishinde brıgadalardyń naýqastarǵa jetý ýaqyty qysqaryp, jedeldigi artqan.
Sonymen birge, sanıtarlyq avıatsııa parkiniń jańartylýyna, jańa áýe kemeleriniń alynýyna da erekshe kóńil bólinip otyr.
− Qazirgi ýaqytta ınvestıtsııalyq kelisimder jasalyp jatyr. Sonyń aıasynda biz barlyq áýe kemelerimiz zamanaýı, jańa bolǵanyn qalaımyz. Jalpy biz postkeńestik elderdiń ishinde sanıtarlyq avıatsııany saqtap qalǵan sanaýly eldiń birimiz. Biz ony ári qaraı damytyp jatyrmyz, − dedi E. Ádilbekov.
Aıta keteıik, byltyr Mindetti áleýmettik medıtsınalyq saqtandyrý aıasynda 1,1 trln teńgege medıtsınalyq kómek kórsetildi.
Sondaı-aq, Qazaqstanda ana ólim-jitimi azaıǵan.