Jańa oqý jylynda Birtutas tárbıe baǵdarlamasy iske asyrylady - mınıstr
«Orta bilim berý mazmunyn odan ári jetildirý jumystary jalǵasyp keledi. Osy jyly oqýlyqtardyń 80 paıyzy tsıfrlyq formatqa kóshirildi. Alǵash ret aýyl mektepteri men shaǵyn jınaqty mektepterdi qoldaý jumystaryn bastadyq. Bul joba pılottyq rejımde Aqtóbe oblysynda júzege asyryla bastady. Onyń maqsaty - ınnovatsııalyq ádisterdi paıdalana otyryp, aýyldyq jáne qalalyq mektepter arasyndaǵy bilim berý sapasynyń alshaqtyǵyn qysqartý», - dedi Ǵ. Beısembaev.
Onyń aıtýynsha, oqýshylardyń áleýetin damytý úshin byltyr zańnamalyq deńgeıde halyqaralyq olımpıadalardyń jeńimpazdaryna jáne olardy daıyndaǵan pedagogterge materıaldyq syıaqy tóleý normasy engizildi.
«Máselen, ótken oqý jylynda qazaqstandyq oqýshylar
312 medal (43 altyn, 95 kúmis jáne 174 qola) jeńip aldy. 27 jeńimpaz jáne 26 pedagog 500-den 1500 aılyq eseptik kórsetkishke deıin syıaqy aldy. Áleýmettik osal sanattaǵy otbasylardyń balalaryna erekshe nazar aýdarylyp otyr. Qazir 421 oqýshyǵa «Bilim-ınnovatsııa lıtseıinde», «Daryn», Respýblıkalyq fızıka-matematıka mektepterinde oqýǵa múmkindik berildi», - dedi mınıstr.
Onyń sózine qaraǵanda, bıyldan bastap tárbıe jumysynyń rólin kúsheıtýge kóp kóńil bólinbek. Osyǵan baılanysty, jańa oqý jylynan bastap barlyq bilim berý uıymdarynda Ata-analardy pedagogıkalyq qoldaý ortalyǵy jumysyn bastaıdy. Olardyń basty basymdyqtary – balalardy oqytý men tárbıeleýde otbasy men mekteptiń ózara is-qımyly boıynsha jumysty kúsheıtý jáne ata-analardyń pozıtıvti mádenıetin damytý.
«Ulttyq quryltaıdyń otyrysynda Memleket basshysy bilim berý salasyna qatysty birqatar negizgi mindetterge toqtaldy. «Ulttyq tárbıe – el bolashaǵy» tárbıesiniń tujyrymdamalyq negizderi engizilip jatyr. Jańa oqý jylynan bastap 2023-2025 jyldarǵa arnalǵan Birtutas tárbıe baǵdarlamasy iske asyryla bastaıdy. Bul qujat jalpy adamzattyq jáne ulttyq qundylyqtar negizinde óskeleń urpaqty tárbıeleý sapasyn arttyrýǵa baǵyttalǵan. Biz oqý saýattylyǵynyń rólin kúsheıtýge, «Oqýǵa qushtar mektep» jobasy aıasynda kitap arqyly tárbıeleýge kóp kóńil bólemiz. Qazir bilim berý uıymdaryndaǵy kórkem ádebıet qory 3,7 mln danaǵa ulǵaıdy. Sondaı-aq, Memleket basshysynyń tapsyrmasy boıynsha «Balalar kitaphanasy» jobasy iske asyrylyp jatyr. Onyń aıasynda mektep kitaphanalarynyń qoryn otandyq jáne álemdik ádebıettiń úzdik úlgilerimen tolyqtyrý josparlanyp otyr. Bul joba ulttyq qundylyqtar negizinde balalardy tárbıeleýge jáne jalpy kitapqa degen qyzyǵýshylyqty oıatýǵa baǵyttalǵan», - dedi Ǵanı Beısembaev.
Eske salsaq, byltyr Úkimet Bilim berý uıymdaryndaǵy birtutas tárbıe berý tujyrymdamasyn ázirleýdi tapsyrǵan edi.
