Jańa qylmystyq-protsestik kodeks qabyldanǵannan beri 50%-dan astam is qysqartylǵan rejimde qaraldy - I.Merkel

ALMATY. QazAqparat - Jańa qylmystyq-protsestik kodeks qabyldanǵan eki aıdan beri qylmystyq isterdiń 50 paıyzdan astamy qysqartylǵan rejimde qaraldy. Bul týraly Almatyda ótken jıyn barysynda QR Bas prokýrorynyń orynbasary Iogan Merkel aıtty.

Prokýratýra ókili jańa zańnamada engizilgen ózgeristerdiń qandaı tıimdilik kórsetkenin atap ótti.

Jańa kodekste kinániń eki túri engizilgen. Birinshisi - kinásin moıyndaý bolsa, ekinshisi - quqyq qorǵaý organdarymen áriptestik ornatý. Áriptes bolǵan adamdarǵa jeńildik retinde maksımaldy merzimniń jartysynan aspaıtyn merzim beriledi. Eki aı ishinde 205 is kelisim arqyly aıaqtalǵan.

«Onyń ishinde jeńil quqyqbuzýshylyq boıynsha - 42, ortasha dárejedegi - 96, aýyr qylmystar boıynsha - 67 is ózara áriptestikpen aıaqtaldy. Sotqa deıingi óndiristik isterdiń 30 paıyzy jedeldetilgen retpen aıaqtaldy. Bul óz kezeginde tergeý amaldaryna úlken demeý boldy. Eki aıdan beri isterdiń 50 paıyzdan astamy qysqartylǵan rejimde qaraldy», - dedi ol.

Jańa kodekste Eýropa elderiniń quqyq qorǵaý júıelerinen alynǵan ozyq tájirıbeler qoldanylǵan. Qamaýda otyrǵan kúdiktini bultartpaý sharasy retinde kepildeme alý engizildi. Eger kepildeme somasy sottyń depozıtine aýdarylsa, onda sottyń kelisimi talap etilmeıdi. Ýaqytsha oqshaýlaý ornynyń basshysy kúdiktini bosata beredi. Óz kezeginde bul ýaqytsha oqshaýlaý oryndarynyń bosaýyna ákeledi.

«Eger bul norma óz tıimdiligin kórsetse, elimizde túrmede otyrǵandar azaıady. Aıtalyq, Ýkraınada jylyna 38 myń adam qamaýǵa alynatyn bolsa, osy ózgeris engizilgeli beri adam sany 12 myńǵa qysqardy. Eki aı ishinde kepildemeni paıdalaný 18 paıyzǵa artty», - dedi I.Merkel.

Onyń aıtýynsha, 2020 jylǵa deıingi quqyqtyq saıasat tujyrymdamasyna sáıkes qaıta qalpyna keltirý ınstıtýttaryn jandandyrý úshin QR qarjy mınıstrligimen birige otyryp, japa shegýshilerdiń ótemaqy qoryn qalyptastyrý týraly zań jasaldy.

«Mundaı qorlar álemniń 20 shaqty elinde bar. Qor túrli baǵytta tolyqtyrylyp otyrady. Bizdiń oıymyzsha, bul asa iri jemqorlyq qylmystardan túsken tárkilengen múlikter, aıyppul bolady. Bul shyǵyndy óteýdiń QPK-te kórsetilgen tetikterin joqqa shyǵarmaıdy. Odan bólek, qıyn jaǵdaıda qalǵan asa muqtaj japa shegýshilerge kómek kórsetiledi», - dedi ol.