Jańa kásipter atlasy memlekettik organdarǵa tanystyryldy
Baıandamashy retinde Saıasat Nurbek sóz sóıledi, ol seriktes retinde atlasty ázirleý jáne engizý boıynsha jobany iske asyrýdyń barlyq kezeńderinde ádisnamalyq, ákimshilik jáne uıymdastyrýshylyq qoldaý kórsetedi.
Onyń aıtýynshva, memleket tarapynan steıkholderler ázirlegen atlasty qoldaný perspektıvalary týraly áńgimeledi, sondaı-aq ony eńbek naryǵyn boljaýdy jaqsartý, joǵary jáne tehnıkalyq jáne kásiptik bilim berý baǵdarlamalaryn jańartý jáne kásiptik standarttardy jańartý quraly retinde paıdalaný úshin negizgi baǵyttar boıynsha usynymdar berdi.
«Jańa kásipter atlasynyń kómegimen ekonomıkanyń árbir salasy boıynsha túrli quzyrettilikterge qajettilikti boljaýǵa bolady, bul bolashaq strategııalyq damý baǵdarlamalarynyń dáldigine oń áser etedi. Budan basqa, bul halyqtyń biliktiligin arttyrýǵa degen túsinigi men qyzyǵýshylyǵyna, ózekti daǵdylarǵa nemese suranysqa ıe mamandyqtarǵa oqytýǵa tartylýyna áser etedi», - dedi Saıasat Nurbek.
Búgingi tańda atlas negizinde bilim berý standarttaryna birqatar jańalyq engizilýde. Mysaly, Hromtaý taý-ken tehnıkalyq joǵary kolledjinde «taý-ken óndirý ónerkásibi men paıdaly qazbalardy óndirýge arnalǵan pılotsyz ushý apparattarynyń operatory» jańa mamandyǵy boıynsha oqytý bastaldy. Osy baǵyttaǵy mamandardy daıarlaýdyń ózektiligin Don taý-ken baıytý kombınatynyń qyzmetkerleri rastaıdy.
Budan basqa, QR Bilim jáne ǵylym mınıstrliginiń TjKB synyptaýyshyna mynadaı mamandyqtar men biliktilikter qosyldy:
– «Robot tehnıkasy jáne endiriletin júıeler (salalar boıynsha)» mamandyǵy jáne «Robot tehnıkasy júıeleri men keshenderin montajdaýshy-retteýshi», «Mobıldi robot tehnıkasynyń tehnıgi», «Ónerkásiptik robot tehnıkasynyń tehnıgi» biliktiligi;
– «Nanomaterıaldar negizindegi buıymdar tehnologııasy» mamandyǵy jáne «Nanomaterıaldar negizindegi buıymdar óndirisiniń operatory» biliktiligi;
– «Óndiristiń addıtıvti tehnologııalary» mamandyǵy jáne «Addıtıvti qondyrǵylardyń operatory» biliktiligi;
– «Qashyqtan basqarylatyn avıatsııalyq júıe» mamandyǵy jáne «Syrtqy ushqysh», «Pılotsyz avıatsııalyq júıelerdi tehnıkalyq paıdalaný jónindegi tehnık-mehanık» biliktiligi;
– «Ǵımarattardy jobalaý men paıdalanýdyń avtomattandyrylǵan júıeleri» mamandyǵy jáne «BIM-paıdalanýshy», «BIM-tehnık», «Ǵımaratty basqarýdyń zııatkerlik júıelerine qyzmet kórsetý tehnıgi» biliktiligi;
– «Jyljymaıtyn múlikti basqarý» mamandyǵy jáne «Kóp páterli turǵyn úıdi basqarýshy» biliktiligi;
– «Destınatsııany basqarý» mamandyǵy jáne «Ekologııalyq týrızm menedjeri», «Týrıstik qyzmetterdi jyljytý jónindegi menedjer», «Týrıstik aqparattyq ortalyqtyń menedjeri» biliktilikteri.
Esterińizge sala keteıik, atlasty ázirleý QR Prezıdentiniń «Igilik barshaǵa! Sabaqtastyq. Ádildik. Órleý» saılaýaldy baǵdarlamasyn iske asyrý jónindegi is-qımyl josparynyń 39-tarmaǵyn oryndaý úshin jáne QR Prezıdentiniń 2019 jylǵy 19 maýsymdaǵy Jarlyǵymen bekitilgen «Birge» jalpyulttyq aktsııasy barysynda alynǵan usynystar negizinde júzege asyryldy.
Atlasty ázirleý ádistemesi halyqaralyq tájirıbege jáne ekonomıka salalaryn damytýdyń álemdik trendterin eskerýge negizdelgen. Ol rapıd forsaıty (rapid foresight) tehnologııasy boıynsha salalyq sarapshylardyń qatysýymen óndiris, memlekettik organdar, salalyq qaýymdastyqtar jáne t. b. ókilderiniń qatysýymen boljamdy sessııalar ótkizýdi qamtydy.
Atlasta ekonomıkanyń basym 9 salasy: taý-ken metallýrgııa kesheni, munaı-gaz salasy, aýyl sharýashylyǵy, kólik jáne logıstıka, mashına jasaý, AKT, energetıka, týrızm jáne qurylys boıynsha eńbek naryǵyn synı túrde ózgertetin negizgi tehnologııalyq trendterge taldaý jasalǵan. Qujatta kásipterdegi taıaýdaǵy 5-10 jylǵa arnalǵan ózgerister boljanyp, sondaı-aq 239 jańa, 95 transformatsııalanatyn jáne 129 joıylyp bara jatqan kásip aıqyndaldy.
