«Jańa ǵasyr áýenderi» atty jas aqyndar antologııasynyń tusaýy kesildi

ShYMKENT. QazAqparat – Shymkentte Jastar jyly aıasynda qalamynan jyr tógilgen jas aqyndardyń «Jańa ǵasyr áýenderi» atty jınaǵynyń tusaý keser rásimi ótti. Jınaqtyń tusaýyn Erlan Aıtahanov saltanatty túrde ashyp, belgili aıtysker aqyn Aqmaral Leýbaeva jastarǵa óziniń arnaýyn aıtty, dep habarlaıdy QazAqparat tilshisi.

Jańa týyndyda qaladaǵy 12 jas aqynnyń qoǵam, rýhanı jańǵyrý, tanym, súıispenshilik, patrıotızm jáne taǵy basqa taqyryptaǵy óleńderi basylǵan. Jınaq tulǵany jan-jaqty damytyp, rýhanı qalyptastyrýǵa baǵyttalǵan. Qala ákimi osy týyndyǵa óleńderi shyqqan shyǵarmashyl jastarǵa shyǵarma arqyly qoǵamda Uly qundylyqtar qalyptastyryp, órkendetý jolyndaǵy qyzmetterine tabys tiledi. Qashan da qoǵamnyń eń ótkir de ózekti máseleleri men ishki bolmysty óleńmen jetkizip, qazaq poezııasyn odan ári damytýǵa úles qosýlaryna tilek bildirdi.

«Bul jınaq oqyrmandardyń qyzyǵýshylyǵyn týdyryp, bolashaǵyn qalyptastyrýǵa zor múmkindik beretinine senimdimin», - dedi qala ákimi Erlan Aıtahanov.

Saltanatty sharada «Sham» jas aqyndar klýbynyń músheleri avtorlyq óleńderin oqydy. Sondaı-aq, shara sońynda jergilikti aqyndar jyr tógip, jańa áýender áýeledi.