Jańa bıznes ıdeıalary: Astanada grant alýǵa ótinim qabyldaý bastaldy

ASTANA. QazAqparat - Astanada jańa bıznes-ıdeıalardy iske asyrýǵa grant alý úshin ótinimderdi qabyldaý bastaldy, dep habarlaıdy QazAqparat elorda ákimdiginiń resmı saıtyna silteme jasap.

Elordada shaǵyn bıznes sýbektilerine jańa bıznes-ıdeıalardy iske asyrý úshin konkýrstyq negizde 5 mıllıon teńgege deıingi mólsherde memlekettik grant bólinedi.

Konkýrsqa 3 jylǵa deıingi jeke kásipkerlik jáne ekonomıkanyń basym sektorlary aıasynda qyzmetin júzege asyratyn respýblıkalyq tizilimge engizilgen áleýmettik kásipkerlik sýbektileri qatysa alady.

Qujattar Kezekte.kz platformasynda onlaın rejımde qabyldanady.

Ótinim berý úshin myna qujattardy usyný qajet:

1) ótinim berý sátindegi jaldamaly jumyskerlerdiń ortasha sany týraly anyqtama;
2) eskirý merzimi 3 jyldan aspaıtyn «Bıznes bastaý» sertıfıkaty;
3) grant somasynyń keminde 20%-y bar bankten úzindi kóshirme;
4) dara kásipkerdi tirkeý týraly habarlama.

Ótinimder 7-16 tamyzda qabyldanady.

Qosymsha aqparatty Astana Investıtsııalar jáne kásipkerlikti damytý basqarmasynyń saıtynan nemese myna telefon nómirleri arqyly alýǵa bolady: [phone]; [phone]; [phone].