Jańa Bas múftıdiń mindeti - ata-babalarymyz ustanǵan haq dinimizdi túrli aǵymdarmen bólshektep, eldi adastyrýǵa jol bermeý
Búgin kezekten tys ótken Qazaqstan musylmandarynyń 7-shi quryltaıynda respýblıkanyń túpkir-túpkirinen elordada bas qosqan ımamdar bul qyzmetke Qazaqstan musylmandary dinı basqarmasynyń Semeı aımaǵy boıynsha ókil ımamy Erjan Maıamerovtiń kandıdatýrasyn qoldap daýys berdi.
Aıta keterligi, osy jyldyń 14 aqpanynda Qazaqstan musylmandarynyń keńeıtilgen tóralqa májilisi ótip, sol jıynda Qazaqstan musylmandary dinı basqarmasy men Orta Azııa múftıleri keńesiniń tóraǵasy Bas múftı sheıh Ábsattar qajy Derbisáli haziret óziniń din qyzmetin qoıyp, biryńǵaı ǵylymı jumyspen aınalyspaq oıy bar ekendigin jetkizgen bolatyn. Bul nıetin jýyrda Elbasy Nursultan Nazarbaevpen kezdesýi barysynda da aıtypty. Quryltaı barysynda sóz alǵan Á.Derbisáli Memleket basshysy óziniń nıetin túsinikpen qabyldap, oń batasyn bergendigin aıta kele: «Elbasy bul usynysyma túsinikpen qarap, «Siz eń bir kúrdeli de qıyn kezeńde Dinı basqarmaǵa basshylyq jasadyńyz. Men sizdiń qyzmetińizge, atqarǵan isterińizge rızamyn. Siz árdaıym meniń qaperimde bolasyz» degen ulaǵatty sóz aıtty», - deıdi.
Sonymen, sonaý 2000 jyly ótken respýblıka musylmandarynyń kezekten tys quryltaıynda elimizdiń Bas múftıi bolyp saılanyp, 13 jyl boıy bul qyzmetti abyroımen atqarǵan Ábsattar qajy Derbisáli Qazaqstandaǵy dinı isterge reforma jasady desek te bolady. Óıtkeni sol kezderden bastap osy ýaqytqa deıin Qazaqstan musylmandary dinı basqarmasy órkenıetti jolmen júrýdiń arqasynda kemeline kelip damydy, buryn bolmaǵan bıik belesterge kóterildi. Basqarmadan jańa basqarmalar men bólimder ashylyp, olarǵa bilikti mamandar tartyldy. Otandyq dinı mamandar daıarlaý isine, ıslamnyń durys nasıhattalýyna erekshe kóńil bólindi. Dinı basqarmaǵa elin, jerin, otanyn, halqyn súıetin, sol úshin aıanbaı qyzmet etýge daıyn dinı saýaty joǵary, bilimdi mamandar jınaldy. Respýblıkamyzda din mamandaryn daıarlaý maqsatynda Nur-Múbárak Mysyr ıslam mádenıeti ýnıversıteti, Imamdardyń bilimin jetildirý Islam ınstıtýty, 2007-2012 jyldary aralyǵynda respýblıkamyzdyń 9 aımaǵynda 9 medirese men 1 qarılar daıarlaıtyn ortalyq ashyldy. Dinı basqarma janynan dinı tanymdyq «Islam jáne órkenıet» gazeti men «Iman» jýrnaly jaryq kóre bastady. Búginde bul basylymdardyń taralymy alǵashqy shyqqan kezdegiden birneshe ese ósip otyr. Sondaı-aq Elbasynyń qoldaýymen qurylǵan «Islam mádenıeti men bilimin qoldaý qory» men basqarma arasyndaǵy kelisim negizinde túrli dinı mazmundaǵy 38 kitap pen kitapshalar mol taralymmen jaryq kórdi. Dinı basqarma atalǵan basylymdardyń 1 432 myńyn meshitterge taratty. Táýelsizdik tańy atyp, qajylyqqa barýǵa jol ashylǵannan keıingi jyldary elimizden qasıetti jerge saparlaıtyndardyń sany ne-bári 150-200 adamdy qurasa, búginde olardyń sany 5 myńnan asady. Qajylyqqa barýdy uıymdastyra bilýdiń nátıjesinde onda barýshylar sany óse túsýde. Búgingi kúnge deıin elimizden 31723 adam qajylyqqa baryp, musylmandyq paryzyn ótedi. Qazaqstan Táýelsizdigi qarsańynda respýblıka kóleminde bar-joǵy 68 meshit bolsa, qazir olardyń sany 2300-den asyp tústi. Jalpy bul derekter Á.Derbisáli haziret atqarǵan ıgi isterdiń bir parasy ǵana.
Al búgingi jıynǵa keler bolsaq, quryltaı barysynda QMDB-nyń Qostanaı oblysyndaǵy ókil ımamy Serik Oraz delegatsııa múshelerine QMDB-nyń Semeı oblysy boıynsha ókil ımamy Erjan Maıamerovty Qazaqstan musylmandary dinı basqarmasynyń tóraǵasy, Bas múftı laýazymyna úmitker retinde usynyp, jınalǵandar biraýyzdan qoldap, daýys berdi.
Osydan keıin minberge kóterilgen E.Malǵajyuly dinge qyzmet saýapty da, jaýapty qyzmet ekendigin aıta kele: «Barshańyzdy, din qyzmetkerlerin, ımam-moldalardy bir maqsatqa, eldiń ıgiligi men yntymaǵyna, din nasıhatyna jumyla jumys isteýge shaqyramyn. Alla barshańyzǵa razy bolsyn!», - dep atap ótti. Osydan keıin Á,Derbisáli jańa saılanǵan Bas múftıge ózi úlgermegen bir isti oryndaýǵa ótinish jasady. «Meniń ótinishim, úlgermegen bir isim bar edi. Sony sen ári jalǵastyrsań. Mynaý Semeı jerinde Abaı atamyz, Shákárim babamyz bilim alǵan Ahmet Rıza degen medrese bolyp, kezinde jabylyp qalǵan. Men sony ashsam, ornyna keltirsem dep armandap júrmin. Biraq kadrlardyń jetispeýshiliginen, basqa da sebepterge baılanysty úlgermedim. Sen sol medreseni qalpyna keltir, Semeı jerinde jańa 10-shy medrese ash», - degen Á.Derbisáli quryltaı qatysýshylaryna Bas múftıdiń orynbasarlaryn da saılaý týraly usynys jasady. Al E.Maıamerov óziniń orynbasarlary, ıaǵnı naıb múftı laýazymyna Qaırat Joldybaıuly men Serik Orazdy usynyp, usynys delegattar tarapynan qoldaý tapty.
Quryltaı aıaqtalǵannan keıin BAQ ókilderine suhbat bergen Bas múftı E.Maıamerov: «Búgin Qazaqstan musylmandary úshin úlken tarıhı oqıǵa boldy. Oǵan ózderińiz de kýá boldyńyzdar. Kezekten tys ótken quryltaı meniń kandıdatýramdy Qazaqstan musylmandary dinı basqarmasynyń tóraǵalyǵyna, Bas múftılikke usynyp, ony quryltaıshylar biraýyzdan qabyldady. Qudaı qalasa, ózimniń kúsh-jigerimdi elimizdiń damýyna, halyqtyń birligi úshin jáne ata-babamyz ustanyp kele jatqan ıslam dini, onyń ishinde Ábý Hanafı mázhaby, ıaǵnı salt-dástúrimizben tutasyp, baılanysyp ketken dinimizdi halyqqa durys jetkizýge jumsaımyn», - dedi.
Osy kúni quryltaıǵa qatysqan Qazaqstan musylmandary dinı basqarmasynyń ókilderi Elbasy Nursultan Nazarbaevpen kezdesti. Kezdesý barysynda Memleket basshysy: «Qazaqstan musylmandary dinı basqarmasynyń Bas múftıi jańadan saılandy. Quttyqtaýymdy qabyl alyńyzdar!», - deı kele Qazaqstan musylmandary dinı basqarmasynyń ókilderine jańa Bas múftı Erjan Maıamerovtyń jumysyna qoldaý kórsetip, jemisti eńbek etetinderine senim bildirdi.
Sondaı-aq Memleket basshysy ata-babalarymyz ustanǵan haq dinimizdi túrli aǵymdarmen bólshektep, eldi adastyrýǵa jol bermeýimiz kerektigin aıta kele, Qazaqstan musylmandary dinı basqarmasyna qoǵamdaǵy ózekti máselelerge qatysty sharıǵat zańdary aıasynda pátýalar shyǵaryp otyrýdy júktedi. Dinı basqarma men memlekettik organdar rýhanı-aǵartýshylyq jáne áleýmettik salada yntymaqtastyqty nyǵaıta túsýge basa kóńil bólýi qajettigin tilge tıek etti. Keıbir jastardyń bizge jat neshe túrli sheteldik ýaǵyzshylarǵa elikteıtini baıqalatyndyǵyn, búgingi tańda elimizde ózderin «naǵyz» musylman retinde kórsetkisi keletin ártúrli aǵymdar boı kórsetip otyrǵandyǵyn basa aıtty.
Sondaı-aq Prezıdent elimizdegi dástúrli ıslamnyń birden-bir moıyndalǵan qurylymy - Qazaqstan musylmandary dinı basqarmasy ekendigin aıtyp óte kele: «Haq dinimiz - ıslam» ósip, órken jaıa bersin», dep aıaqtady sózin.