Jańa Ádep kodeksi – jańasha qadam
- Darhan Medeǵalıuly, jaqynda Prezıdent Jarlyǵymen memlekettik qyzmetshilerdiń Ádep kodeksi jańa redaktsııada qabyldandy. Ádep kodeksine ózgeris engizýge ne sebep boldy?
- Ózderińizge málim, Memleket basshysy Qasym-Jomart Toqaev aǵymdaǵy jyldyń qańtar aıynda Parlament Májilisiniń otyrysynda jáne keıinnen sybaılas jemqorlyqqa qarsy is-qımyl máseleleri jónindegi jıynda sóılegen sózinde memlekettik apparattyń jumysyna jańasha kózqaras qajet ekenin jáne memlekettik qyzmet júıesi is júzinde servıstik sıpat alyp, klıentke baǵdarlanýy úshin túbegeıli ózgeristi talap etetinin atap ótti.
Qoǵamda bolyp jatqan ózgerister men kúndelikti ómirdegi jekelegen faktorlar memlekettik basqarý júıesin jańasha uıymdastyrý qajet ekendigin uǵyndyryp otyr. Memlekettik basqarýdy jańasha uıymdastyrý –Jańa Qazaqstandy qalyptastyrý jolyndaǵy basty faktor.
Osyǵan baılanysty qoǵamnyń memlekettik organdarǵa degen senim deńgeıin arttyryp, halyqpen keri baılanysty jaqsartý baǵytynda jumystar atqarylýda. Bizge, adamǵa baǵdarlanǵan memlekettik basqarýdyń jańa modelin qalyptastyrý qajet.
Osy turǵydan alǵanda, jańa Ádep kodeksi qyzmettik ádep normalaryn durys túsinýde jáne qoldanýda erekshe mańyzǵa ıe.
Memlekettik qyzmet júıesinde qalyptasyp otyrǵan birqatar syn-tegeýrinderdi sheshý Ádep kodeksin jańa redaktsııada qabyldaýǵa basty sebep boldy.
- Qysqasha aıtyp ótseńiz, jańa Ádep kodeksinde ne ózgerdi?
- Eger burynǵy Ádep kodeksinde memlekettik qyzmetshilerge qoıylatyn moraldyq-adamgershilik talaptar men olardyń minez-qulqynyń negizgi qaǵıdattary birge qaralyp kelgen bolsa, jańa redaktsııada bul olqylyqtar joıylyp, memlekettik qyzmetshige qoıylatyn ádep talaptary memlekettik qyzmetshiniń qyzmettik ádebine qatysy joq erejelerden bólek, óz aldyna jeke qarastyrylyp otyr.
Jańa Ádep kodeksi eń aldymen qyzmettik ádep standarttaryn belgileýge baǵyttalǵan jáne memlekettik qyzmetshilerdiń boıynda moraldyq-adamgershilik qasıetterdi ornyqtyrýdyń negizi bolyp tabylady.
Munymen qatar, jańa Kodekste Agenttik pen onyń aýmaqtyq organdary, qyzmettik ádepti buzýdyń profılaktıkasyn úılestirýshi organdar retinde aıqyndalyp otyr. Osyǵan baılanysty, aldaǵy ýaqytta Ádep jónindegi ýákilderdiń, Komıssııalar men keńesterdiń ádep buzýshylyqtardy eskertý jáne aldyn alý boıynsha jumystary jandandyrylatyn bolady.
- Kodekstiń jańa redaktsııasynda memlekettik qyzmetshilerge qoıylatyn talaptarǵa qatysty qandaı ózgerister bar?
- Jańa redaktsııada Kodekstiń qurylymy ózgertilip, «Memlekettik qyzmettiń ádeptik qaǵıdattary» dep atalatyn taraý engizilip otyr. Osyǵan sáıkes, memlekettik qyzmetshilerdiń qyzmettik ádebi alty qaǵıdatqa negizdelgen.
Olar – adal nıettilik, adaldyq, ádildik, ashyqtyq, sypaıylyq jáne klıentke baǵdarlanýshylyq. Aıta ketý kerek, memlekettik qyzmetshilerge mundaı talaptar burynǵy kodekste de qoıylǵan. Biraq, baıqasańyz, Kodekstiń jańa redaktsııasynda ashyqtyq jáne klıentke baǵdarlaný qaǵıdattaryn saqtaý talaptaryna basymdylyq berilgen. Soǵan sáıkes memlekettik qyzmetshiler memlekettik qyzmettiń negizgi tutynýshysy sanalatyn halyqtyń talabyna barynsha ıkemdi, jurtshylyqpen jumys isteýge daıyn bolýy jáne óz jumysynyń ashyqtyǵyn qamtamasyz etýi tıis.
Jalpy alǵanda, negizgi ózgerister osy baǵyttarda bolyp otyr. Kodekske engizilgen túzetýler servıstik, ashyq jáne halyq úshin qoljetimdi memlekettik apparattyń qalyptasýyna yqpal etedi dep kútilýde.
- Darhan Medeǵalıuly, tolyqqandy aqparat úshin rahmet. Jańa Ádep kodeksi halyqtyń memlekettik ınstıtýttarǵa senim deńgeıiniń artýyna yqpal etedi dep úmittenemiz.
