Jambyldyq fermerler saılaýdy qoldaıdy

TARAZ. QazAqparat - Jambyldyq fermelerler QR Prezıdentiniń kezekten tys saılaýyna bir kisideı qatysýǵa nıetti. Bul týraly «Qazaqstan Fermerler odaǵy» respýblıkalyq qoǵamdyq birlestiginiń oblystyq fılıalynyń uıymdastyrýymen ótken jıynda aıtyldy, dep habarlaıdy QazAqparat tilshisi.

Jıyndy «Qazaqstan Fermerler odaǵy» RQB Jambyl oblystyq fılıalynyń tóraǵasy Jıgýlı Daırabaev ashyp, saılaýdyń saıası jáne ekonomıkalyq-áleýmettik mańyzyna toqtaldy.

«Prezıdent belgilegen saılaýǵa oblys turǵyndary úlken jaýpkershilikpen qaraıdy degen senimdemin. Óıtkeni Elbasy N.Nazarbaev óziniń otyz jylǵa jýyq basqarýynda Qazaqstandy álemge tanytty. Syrtqy jáne iski saıasatty qalyptastyrdy. Qazaqstandy damýshy el retinde álem moıyndady. Qazir ekonomıkalyq-áleýmettik salada úlken irgeleýshilik bar. Endi biz el damýynyń jańa kezeńine belsene aralasyp, kelesi Prezıdentti durys tańdaý úshin saılaýǵa bir kisideı atsalysýymyz kerek»,- dedi Jambyl aýdandyq fermerler odaǵy jáne «Amangeldi» óndiristik kooperatıviniń tóraǵasy Qasymhan Qanaev.

Elimiz úshin tarıhı ári mańyzdy kezeńde halyqpen birlese otyryp el basshysyn tańdaý bolashaǵymyzǵa tikeleı áser etedi deıdi óńir fermerleri.

Aıta keteıik, búginde aımaqta on jeti myńǵa jýyq aýyl sharýashylyǵymen aınalysatyn fermerler bar. Olardyń deni egin jáne mal baǵyty boıynsha kásipterin dóńgeletip otyrǵandar.

Jıynda sóz alǵan ózge de sharýashylyq eńbekkerleri saılaý naýqanyna tas-túıin daıyn ekendikterin aıtyp, barynsha atsalysatyndaryn jetkizdi. Olar elimizdiń órkendeýine súbeli úles qosatyn basshyny tańdaý - árkimniń azamattyq quqyǵy hám paryzy dep sanaıdy.

«Meniń oıymsha, álemdegi halyqaralyq saıası jaǵdaıdyń turaqsyz bolyp turǵan kezeńinde, eldegi qaýipsizdikke tikeleı qatysy bar áleýmettik-saıası kelisimdi, turaqty progresti qamtamasyz etý, áleýmettik-ekonomıkalyq damý mindetterin sheshý úshin prezıdenttik saılaýdy ótkizý durys sheshim. Memleket basshysynyń Prezıdent saılaýyn ótkizý týraly úndeýi óte ózekti, ýaqyt talabynan týyndaǵan másele dep esepteımin. Oblys sharýalary Prezıdenttiń sheshimin tolyqtaı qoldaıdy. Eldegi eń mańyzdy saılaýdy aldyn-ala ótkizip alǵan soń, Qazaqstan bar kúsh-jigerin áleýmettik-ekonomıkalyq saladaǵy túıindi máselelerdi sheshýge jumsaıdy degen senimdemin»,-deıdi Merki aýdandyq fermerler odaǵynyń jáne «Sovet» sharýa qojalyǵynyń jetekshisi Sovet Qalmanbetov.