Jambylda jyl basynan beri 80 jasóspirim úıinen qashqan

TARAZ. QazAqparat - Jambyl oblysynda jyl basynan beri kámeletke tolmaǵan 80 jasóspirim úıinen jáne ýaqytsha bolý oryndarynan qashyp ketken. Olardyń kóbisi az ýaqyt ishinde tabylyp, úılerine qaıtarylyp otyrǵan, dep habarlaıdy QazAqparat tilshisi.

Qashqan balalardyń ishindegi beseýi áleýmettik mekemedegi jasóspirim. Qalǵan 75-i ókinishke qaraı, óz úılerinen ketip qalǵan. Munyń ishinde altaýynyń psıhıkalyq aýytqýlary bolǵan.

Jambyl oblystyq polıtsııa departamenti jergilikti polıtsııa qyzmeti basqarmasy bastyǵynyń mindetin atqarýshy, polıtsııa maıory Manas Ábdikárimovtyń aıtýynsha, negizinen qyzdardyń qashyp ketýi jıi oryn alady, al uldardyń ketýi sırek.

«Ókinishke qaraı, óz úılerinen qashatyn jasóspirimder qatary azaımaı tur. Keıbireýi tipti bir emes, birneshe ret qashqan. Sebepterine keler bolsaq, olardyń qatarynda úı sharýasymen aınalysqysy kelmeı, sabaq oqyǵysy kelmeı qashatyndar da bar. Keıde balalardy úıden qashýǵa ata-anasynyń ádepsiz minez-qulyqtary, alkogoldik ishimdik ishýleri, qol kóterýleri sebep bolady. Adasyp nemese uzaq ýaqyt oınap, urys estimeý úshin úıine barmaı júretin balalar da bar. Al, áleýmettik mekemelerden ketý sebepterin balalar ol jerdiń rejımine úırene almaǵandarymen túsindiredi.

Ókinishke qaraı, mundaı balalar aldap-arbaýǵa, qylmystyq azǵyndyq áreketterge ilesip nemese qylmystyń qurbany bolyp jatady. Ata-analar aldymen osy jaǵyn eskerse eken», – deıdi Manas Ábdikárimov.

Buǵan deıin biz Jambyl oblysynda balalardyń jol apatynan qaza bolýy 4 ese artqany týraly jazǵan bolatynbyz.