Jambylda Úkimet basshysyna robotty tehnıkanyń ázirlengen júıesi tanystyryldy
Jıynǵa JOO rektorlary, kolledjderdiń dırektorlary, jastar men stýdentter uıymdarynyń, «Atameken» UKP, bıznes qaýymdastyqtar, ÚEU jáne oblystyq prokýratýra ókilderi qatysty.
Elbasy óziniń jyl saıynǵy Joldaýlarynda bilim berý júıesine aıryqsha nazar aýdaratynyn aıta ketken jón. Mańyzdy máseleler - mektep qabyrǵasynan bastap kolledjder men ýnıversıtetterge deıin sapaly kadrlardy daıarlaý. Prezıdent bilim, ǵylym jáne densaýlyq saqtaý shyǵyndaryn barlyq kózderden bes jyl ishinde JІÓ-niń 10%-na deıin jetkizýdi tapsyrdy. Qazirgi tańda bilim berýge jumsalǵan shyǵyndar JІÓ-niń 7,3-7,4%-yn quraıdy.
Úkimet Prezıdenttiń tapsyrmalaryn oryndaý úshin qajetti sharalardy qabyldap jatyr. Aldaǵy úsh jylda Joldaýdy iske asyrýǵa 1,75 trln teńge baǵyttalady. 2019 jylǵy 1 qańtardan bastap eń tómengi jalaqy mólsheri 1,5 esege - 28-den 42 myń teńgege deıin ósedi. Osylaısha, 1,3 mln jaldamaly jumysshynyń jalaqysy 30%-ǵa ósedi. Sondaı-aq, bul 275 myń azamattyq qyzmetkerge, onyń ishinde pedagog mamandaryna qatysty, olardyń jalaqysy 35%-ǵa artady.
Premer-Mınıstr «Muǵalim mártebesi týraly» zań qabyldanǵannan keıin josparlanǵan reformalardy bastaý týraly sheshim qabyldanǵanyn atap ótti. Muǵalimniń mártebesin kóterý - keleshek urpaqty tárbıeleýdiń negizi, óskeleń urpaq úshin muǵalim úlgi jáne ónege bolýy tıis. Buǵan qosa ýnıversıtetterde muǵalimderdi daıarlaý máselesine erekshe kóńil bólý qajet.
Bilim berý júıesiniń mańyzdy máseleleriniń biri - sapa men baǵa arasyndaǵy sáıkessizdik. Osyǵan baılanysty B. Saǵyntaev kezdesý qatysýshylaryn sebepterdi anyqtaýǵa jáne birlesip qajetti sharalardy qabyldaýǵa shaqyrdy. JOO-lar men kolledjderge qoıylatyn talaptar - túlekterdiń jumysqa ornalasýyn qamtamasyz etý jáne oqytýshylar quramynyń tıisti biliktiliginiń bolýy. Bul úshin birqatar sheshimder qabyldandy: JOO-lardan jumysqa ornalasý kórsetkishteri tómen mamandyqtardyń lıtsenzııalary qaıtaryp alynady, árbir bes jylda oqytýshylar biliktilik talaptaryna sáıkes emtıhan tapsyrady. Budan ózge, ýnıversıtetter men kolledjderdiń tehnıkalyq jabdyqtalýy zamanaýı talaptarǵa sáıkes kelýi kerek ekeni atalyp ótti.
Sonymen qatar, kezdesý barysynda Jambyl oblysynyń bilim berý salasynyń ókilderi sóz sóıledi. M. H. Dýlatı atyndaǵy Taraz memlekettik ýnıversıtetiniń rektory M. Sarybekov oblysta bilim berý júıesin odan ári damytý baǵyttary arasynda zamanaýı talaptardy jáne óńir ekonomıkasynyń qajettilikterin eskere otyryp, jańa mamandyqtardy ashý máselesin atap ótti. Taraz memlekettik pedagogıkalyq ýnıversıtetiniń rektory E. Ámirbekuly oqytýǵa jańa pándi qosý týraly usynys bildirdi. Taraz ınnovatsııalyq-gýmanıtarlyq ýnıversıtetiniń rektory E. Saýraqov búginde Prezıdenttiń Bes áleýmettik bastamasyn oryndaý aıasynda iske asyrylyp jatqan stýdent jastardy jataqhanamen qamtamasyz etý máselesin kóterdi. Qarataý gýmanıtarlyq-tehnıkalyq kolledjiniń dırektory D. Máselbekov óz sózinde jumysshy mamandyqtary (ınjenerlik-pedagogıkalyq, qurylys, hımııa jáne t.b.) boıynsha qosarly bilim berý taqyrybyn qozǵady.
Oblystyq Bilim basqarmasynyń basshysy R. Turmahanbetova óz kezeginde óńirde mektepke deıingi jáne orta bilim berýdiń qoljetimdiligi men sapasyn arttyrý boıynsha qabyldanyp jatqan sharalar týraly baıandady. Mektepke deıingi bilim berý boıynsha: osy jyldyń basynan beri oblysta 3357 orynǵa arnalǵan 35 mekeme, onyń ishinde 30 jekemenshik balabaqsha men 5 shaǵyn ortalyq ashylǵan. Osylaısha, 3 jastan 6 jasqa deıingi balalardy qamtý 98% quraıdy. Prezıdenttiń tapsyrmasy boıynsha orta bilim berý sapasyn arttyrý maqsatynda Nazarbaev zııatkerlik mektepteri júıesine 40 bilim berý mekemesi kóshirildi. 16 myńǵa jýyq muǵalim eńbekaqylaryna 30% kóleminde ústeme aqy alady.
Buǵan qosa, máselelerdi talqylaý barysynda stýdent jastardyń ókilderi Prezıdenttiń Qazaqstan halqyna Joldaýynda aıtylǵan bastamalarǵa qoldaý bildirdi. Atap aıtqanda, Jambyl polıtehnıkalyq joǵary kolledjiniń IV kýrs stýdenti M. Asylhan jańa nemis bilim berý baǵdarlamasy boıynsha alǵan tájirıbesimen bólisti. Baǵdarlama birneshe biliktilikti alýǵa múmkindik beredi. Máselen, 2,5 jyl ishinde ol 10-ǵa jýyq biliktilikti ıgerdi: bul - sylaq jáne geodezııalyq jumystar, kirpish qalaý, beton, montaj jáne árleý jumystary. Alynǵan bilimder men daǵdylar eńbek naryǵynda tıisti jumysty tabýǵa eleýli septigin tıgizedi.
Taraz memlekettik pedagogıkalyq ýnıversıtetiniń sońǵy kýrs stýdenti Ú. Іlııasova, óz kezeginde, «Muǵalim mártebesi týraly» zańdy qabyldaý jónindegi Elbasynyń bastamasyn qoldaıtynyn jetkizdi. Onyń aıtýynsha, bul jas pedagogtar men stýdentterdi jigerlendiredi. Atalǵan zań jas mamandarǵa ózderine degen senimdi uıalatyp, sátti nátıjeler kórsetýge jol ashady, al bilim berý salasyn qarjylandyrýdy ulǵaıtý jas mamandardyń ustaz bolýǵa degen qyzyǵýshylyǵyn oıatpaq.
«Elbasymyz bıylǵy Joldaýynda 2019 jyldy jastar jyly dep belgiledi. Bes áleýmettik bastamasynda jataqhana máselesine toqtaldy. Bunyń barlyǵy jastarǵa jasalyp jatqan qoldaý dep bilemiz. Biz, jastar, Prezıdentke sheksiz alǵys aıtamyz», - dedi óńir jastarynyń atynan Ú. Іlııasova.
Premer-Mınıstr óńirde bilim berý qyzmetteriniń sapasymen tanysý maqsatynda joǵary polıtehnıkalyq kolledjdiń materıaldyq-tehnıkalyq jabdyqtalýyn tekserdi. Jalpy hımııa zerthanasyna bardy, onda hımııalyq taldaýǵa arnalǵan jańa qondyrǵylar engizilgen. Budan ózge, B. Saǵyntaevqa robotty tehnıkanyń ázirlengen júıesi tanystyryldy. Jambyl oblysy ákimdiginiń derekteri boıynsha tehnıkalyq jáne kásiptik bilim berý salasynda 48 uıym jumys isteıdi, onyń 25-i - memlekettik. 2018 jyly ekonomıkanyń 94 basym salasy boıynsha 27 396 stýdent, onyń ishinde 14 657 - memlekettik tapsyrys boıynsha TjKB alýda.
