Jambylda sarbazdyń ózin óltirýine sebepshi boldy degen áskerı qyzmetshini sot aqtady

ShYMKENT. QazAqparat - Búgin Shymkent garnızonynyń áskerı sotynda kúsh qoldaný arqyly qorqytty ( QK 194-baby 2-bóligi 1-tarmaǵy) jáne bılikti asyra paıdalandy (QK 451-baby 1-bóligi) dep aıyptalǵan shekara zastavasynyń serjanty N-ǵa úkim shyqty. Sondaı-aq oǵan áskerı qyzmetshi B-ny ózin óltirýge deıin jetkizdi degen aıyp taǵylǵan (QK 451-babynyń 2-bóligi jáne 105-baby 2-bóliginiń 1-tarmaǵy), dep habarlaıdy QazAqparat áskerı sotqa silteme jasap.

N. shekara zastavasynda kelisimshart boıynsha mobıldi toptyń basshysy retinde qyzmet atqardy.

2022 jylǵy tamyzda ol áskerı qyzmetshiler Qarýly Kúsh jarǵysyn buzyp, narıadtaǵy beketterdi óz erkimen aýystyrǵanyn anyqtady.

N. osyny paıdalanyp, jábirlenýshi Q-dan aqsha bopsalap, nátıjesinde sońǵysy atalǵan somany sottalýshynyń bank shotyna aýdarǵan.

N. shekara zastavasynyń aýmaǵynda alkogol ishken jábirlenýshi B, K, A-ny kórip, qyzmettik ókilettigin asyra paıdalanyp, olarǵa dene jaraqatyn salǵan.

Sottalýshynyń kinási jábirlenýshilerdiń, kýágerlerdiń aıǵaqtarymen, zattaı dáleldemelerdi qarap tekserýmen, onyń ishinde banktik shottan úzindi kóshirmemen, shekara zastavasynan alynǵan beınejazbamen jáne qylmystyq istiń basqa da materıaldarymen dáleldendi.

Sonymen birge, sotta onyń áskerı qyzmetshi B-nyń ózin-ózi óltirýge deıin jetkizý faktisi rastalmady.

N. qaramaǵyndaǵy B-ǵa júıeli jáne negizsiz talap qoıdy, onyń ar-namysy men qadir-qasıetin qorlady dep aıyptaldy.

Alaıda, sot belgilegendeı, sottalýshy zastava aýmaǵynda nebári 8 kún bolǵan, onyń ishinde jábirlenýshimen birneshe ret ǵana kezdesken jáne mundaı qysqa merzimde sýıtsıd úshin jaǵymsyz jaǵdaı týǵyza almady.

Dáleldemeler sottalýshynyń bul áreketke qatysy baryn joqqa shyǵardy.

Sot úkimimen N. QK-niń 194-baby 2-bóliginiń 1-tarmaǵy jáne 451-babynyń 1-bóliginde kózdelgen qylmystar jasaǵany úshin kináli dep tanyldy jáne qylmys jıyntyǵy boıynsha 3 jyl 6 aıǵa bas bostandyǵynan aıyryldy.

QK 105-baby 2-bóliginiń 1-tarmaǵynda jáne 451-babynyń 2-bóliginde kózdelgen qylmystar boıynsha N. sot úkimimen kinásiz dep tanylyp, aqtaldy.

B-nyń qaıtys bolý faktisi boıynsha qylmystyq is materıaldary ońtústik óńirdiń áskerı prokýroryna jiberildi.

Úkim zańdy kúshine engen joq.

Eske sala keteıik, Bas áskerı prokýratýra byltyr tamyzda «Shóldala» shekara zastavasynyń merzimdi áskerı qyzmetshisi B. Mırashtyń ózine qol salý deregine qatysty tergeý júrip jatqanyn málimdegen.

Bıyl aqpan aıynda «Shóldala» shekara bólimshesindegi jaýynger ólimi faktisi boıynsha ishki tergeý júrgizilip, birneshe adam qyzmetinen shettetilgen edi.

Sarbaz óliminen keıin bes adam qyzmetinen bosatylǵan.