Jambylda eki temirjolshyny poıyz basyp ketti

TARAZ. QazAqparat – Jambyl oblysynda poıyz basyp ketken eki temirjolshy oqıǵa ornynda qaıtys boldy, dep habarlaıdy QazAqparat tilshisi.

Oqys oqıǵa Jambyl oblysynyń Bel stantsııasyna jaqyn mańda oryn alǵan. Temirjoldyń boıynda júrgen jumysshylardy «Almaty-Aqtóbe» baǵytyna qatynaıtyn jolaýshylar poıyzy qaǵyp ketedi. Saldarynan temirjolshylar alǵan jaraqatynan sol jerde kóz jumǵan. Qazirgi tańda temirjol uıymynyń eki jumysshysyn jolaýshylar poıyzynyń basyp ketýine baılanysty tergeý bastaldy. Bul týraly QR ІІM Kólik departamentiniń baspasóz qyzmeti málimdedi.

«13 qańtarda jolaýshylar poıyzy Jambyl oblysynyń Bel stantsııasyna kirgen kezde «Almaty-Aqtóbe» poıyzy eki adamdy qaǵyp ketti. Olar oqıǵa ornynda qaıtys boldy. Tekserý kezinde olardyń temirjol uıymdarynyń 33 jáne 44 jastaǵy jumysshylary ekeni anyqtaldy» delingen vedomstvonyń habarlamasynda.

Atalǵan fakti Qylmystyq kodekstiń 344-baby 3-tarmaǵy «Temirjol kóligin paıdalaný nemese paıdalaný kezinde qaýipsizdik erejelerin buzý, abaısyzda eki nemese odan da kóp adamnyń qaıtys bolýyna ákelip soqtyrý» boıynsha sotqa deıingi tergeýdiń biryńǵaı tiziliminde tirkelgen.