Jambylda «Beıbitshilik pen kelisim» atty jańa joba bastaldy
Oblys ákimi Berdibek Saparbaevtyń tóraǵalyǵymen ótken jıynda jańa jobasynyń júzege asý barysy talqylandy. Atalǵan jobanyń maqsaty – qoǵamdyq-saıası ahýaldy monıtorıngileý, jergilikti halyqty tolǵandyratyn ózekti máselelerdi anyqtaý jáne sheshý bolyp tabylady.
«Qordaı aýdanynda bolǵan oqıǵalar jergilikti turǵyndardyń arasynda birqatar máseleniń bar ekendigin kórsetip berdi. Aldaǵy ýaqytta osyndaı jaǵdaılar bolmaýy úshin aldyn alý jumystaryn kúsheıtý, barlyq tıisti sharalardy qabyldaý kerek. Jergilikti halyqtyń búgingi tynys-tirshiligin jáne olardy qandaı máseleler tolǵandyratynyn zerdelep otyrý qajet», - dep atap ótti aımaq basshysy.
Joba aıasynda aqparattyq-túsindirý jumystaryn júrgizý, áleýmettik máseleler men aýyl sharýashylyǵy máselelerin, dinı aspektiler men qaýipsizdikti zerdeleý sekildi baǵyttary boıynsha bes jumys toby quryldy.
Árbir jumys tobynyń tizimderi bekitilip, oǵan tıisti vedomstvolardyń birinshi basshylary men salalyq mamandar endi. Aımaq basshysy jaýapty tulǵalarǵa ár eldi mekenniń eń aýqymdy máselelerin zerttep, jergilikti turǵyndardy tolǵandyryp, alańdatatyn máselelerdi anyqtaýdy tapsyrdy.
Aıta ketý kerek, jumys toby eń aldymen 12 naýryz kúni Qordaı aýdanyna attanbaq. Bul turǵydaǵy jumystar oblystyń barlyq aýdandarynda jalǵasyn tabatyn bolady.
Aýdandardaǵy tıisti ahýaldy zerdeleý qorytyndylaryna sáıkes naqty usynystar ázirlenbek. Mundaǵy basty maqsat – tek Jambyl oblysynda ǵana emes, jalpy el boıynsha aldyn alý sharalaryn ázirleý jáne qabyldaý.
