Jambyl oblysynyń səıgúligi Alaman báıgede top jardy
Osymen 20 jyl qatarynan ótkizilip kele jatqan básekege elimizdiń túkpir-túkpirinen jáne kórshi memleketterden jalpy sany 170-ten astam súıgúlik qatysty.
Kórermenderdi qıqýlatyp, qoshemetine bólegen tartysqa toly báıgeniń nátıjeleri tómendegideı:
Taı jarysta 1-orynǵa Jambyl aýdanynyń atynan topqa túsken "Hantáńiri" júırigi keldi. 2-oryndy Qarasaı aýdanynyń namysyn qorǵaǵan "Ferdoýs" atty júırik ıelendi. 3-oryndy Talǵar aýdanynda baptalǵan "Tumar" atty júırik qanjyǵasyna ildi. Jeńimpazdar men júldegerlerge aqshalaı syılyqtar tabys etildi.
Jorǵa attar jarysynda birinshi kelgen Astana qalasynyń "Edelveısi" boldy.
Máre syzyǵyn ekinshi bolyp Alakól aýdanynynyń "Kosmos" atty jorǵasy kesti. Úzdik úshtikti Sarqan aýdanynan topqa túsken "Temirtas" túıindedi. Jeńimpazdarǵa sáıkesinshe "Lada granta" avtokóliginiń kilti, 150,0 jáne 120,0 myń tg. tabystaldy.
Qunan báıgede toptan oq boıy oza kelgen Qarasaı aýdanynyń "Nurqasqasy" birinshi oryndy ıelendi. Ekinshi bolyp top jarǵan Talǵar aýdanynan jetkizilgen "Barbara" sáıgúligi. Baby jarasyp, úzdik úshtikten kóringen Jambyl oblysynyń "Astana" atty qunany. Bul joly da jeńimpazdar úshtigine joǵaryda atalǵandaı syılyqtar tabys etildi.
Top báıgede 1-oryndy kórshi Jambyl oblysynan jetkizilip, topqa qosylǵan "Júrektory" atty sáıgúlik ıelendi. Jeńimpazǵa "Nıva" avtokóliginiń kilti tabystaldy. 2-oryndy ıelengen Qarasaı aýdanynyń "Qarashash" atty júıriginiń ıesi "Lada Granta" avtokóligin qanjyǵasyna baılady. 3-oryn da osy Qarasaı aýdanynyń júırigi "Jel" atty tulparyna buıyryp, ıesine 150 000 teńgeniń sertıfıkatyn jeńip alýyna múmkindik jasady.
Osydan keıin at jarystyń tóresi sanalatyn 25 shaqyrymdyq Alaman báıgeniń de kezegi kelip jetti. Oǵan elimizdiń ár túkpirinen 50 júırik qosyldy. Nátıjesinde jeke dara ozyp, topty jarǵan Jambyl oblysynyń "Qarakóz" atty júırigi ıesi Artyǵalı Mırazovqa "ÝAZ Patrıot" avtokóliginiń kiltine ıe bolýyna jaǵdaı jasady. Máre syzyǵyn jeńimpazdan sál ǵana qalyp kesip ótken Qarasaı aýdanynyń "Buırajal" atty sáıgúliginiń ıesine "Nıva" avtokóliginiń kilti syıǵa berildi. Sondaı-aq úshinshi jáne tórtinshi oryndardy Jambyl aýdanynan kelgen "Kókdaýyl" men "Nurqasqa" atty qos júırik ıelendi. Júldegerlerge sáıkesinshe "Lada Granta" avtokóligi men 200 myń teńge qarjylaı syılyqtar tabystaldy. Sondaı-aq osy kúni kópshilik aldynda óner kórsetken "Qyz qýý" men "Aýdaryspaqqa" qatysqandar jankúıerlik etýge jınalǵan myńdaǵan kórermenniń kóńilin kóterip, qoshemetine bólendi.