Jambyl oblysynda toqsan saıyn tildik ahýal zerdelenedi
Jambyl oblysynda toqsan saıyn aımaqtyń tildik ahýaly zerdelenedi. Bul maqsatta aımaqtaǵy atqarýshy organdardyń kiris-shyǵys qujattaryna monıtorıng jasalady. Byltyr memlekettik organdardaǵy qazaq tilindegi shyǵys qujattarynyń úles salmaǵy –99,2 paıyzdy quraǵan.
Spıkerdiń aıtýynsha, jambyldyq turǵyndardyń tildik ahýalyna ótken jyly áleýmettik saýalnama júrgizilgen. Nátıjesinde, memlekettik tildi meńgergen halyqtyń úlesi 91,9 paıyzdy kórsetken.
Sondaı-aq, aǵylshyn tilin biletin turǵyndar úlesi 27,7 paıyz. Úsh tildi meńgergen turǵyndar úlesi – 27,8 paıyzdy quraǵan.
«Byltyr Jambyl oblysynda til saıasatyn júzege asyrýǵa jergilikti bıýdjetten 157 mln.teńgeden astam qarjy bólingen. Byltyr memlekettik tildi meńgergen memlekettik qyzmetshilerdiń úlesi 48%-dy qurap, 28 paıyzǵa artqan. Sonymen qatar, memlekettik qyzmet
kórsetetin uıym qyzmetkerleri 62,2 paıyzdy qurap, 26,7 paıyzǵa artqan. Byltyr úsh tildi oqytý boıynsha barlyǵy 3512 tyńdaýshy tegin oqý kýrstaryna jiberilgen. Memlekettik tildi oqytýdan 2385 tyńdaýshy ótse, onyń ishinde 93,8 paıyzy ózge ult ókilderi»,- deıdi basqarma basshysy.
Aıta ketý kerek, aımaqta etnostardyń óz ana tilderin oqytý da jolǵa qoıylǵan. Osy baǵyttaǵy oqytý boıynsha byltyr barlyǵy 142 adam qamtylypty. Onyń ishinde 36-sy ázerbaıjan, 60 dúngen, 19 kúrdi, 16 balqar men 12 qyrǵyz bar. Al qazaq tilin tildesý arqyly meńgertýge, qazaq tilinde oıyn erkin jetkize bilýge úıretýge jaqsy jaǵdaı jasalǵan. Bul rette TedX formatynda júrgiziletin barlyq aýdanda «SÓILE» klýbtary qurylǵan. Ótken jyl ishinde «SOILE» klýbynyń 97 otyrysy ótken. Nátıjesinde, 1600-den asa ózge ult ókili memlekettik tilde erkin sóıleýge úıretetin tildik ortaǵa tartylǵan.
