Jambyl oblysynda taý-shańǵy bazasy ashyldy
Aımaq basshysy Nurjan Nurjigitovtyń sózinshe, jergilikti jerdiń aýa raıy, tabıǵaty týrızmdi damytýǵa qolaıly.
«Shańǵy bazasynyń qysqy sport túrlerimen jáne ashyq aýada serýendeýdi unatatyndar úshin taptyrmas oryn bolatyny sózsiz. Munda jambyldyqtar ǵana emes, kórshiles oblystardyń turǵyndary demala alady. Kelýshilerdiń qysy-jazy demalýy úshin barlyq jaǵdaı jasalǵan.
Oblys aýmaǵynda týrızmdi damytýǵa erekshe kóńil bólinýde. Ótken jyly Taraz elimizdiń qalalary arasynda birinshi bolyp Dúnıejúzilik qolónershiler qalalarynyń tizimine resmı túrde endi. Óńirdiń tarıhı-mádenı áleýetin eskere otyryp, týrıstik ınfraqurylymdy damytý jumystaryn júıeli túrde júrgizetin bolamyz», - dedi oblys ákimi.
Bazanyń shańǵy jolaǵy osy sport túrine jańadan áýestene bastaǵan adamdar úshin óte qolaıly jasalǵan. Onyń aýmaǵynda shańǵylar men snoýbordtardy jalǵa berý pýnkti (100 birlik), sholý alańy, dámhana ornalasqan.
Oblystaǵy týrıster aǵynynyń artýyn eskere otyryp, jyl boıy úzdiksiz qyzmet etetin týrızm klasterin damytý josparlanýda. «Kóksaı» kesheninde qys mezgilinde ǵana emes, jazǵy demalysqa da tıisti jaǵdaılar jasalǵan. Munda úlken etno-aýyl, qonaq úı kesheni, meıramhanalar salynǵan. Demalys ortalyǵy kúnine 500 adamdy qabyldaı alady. Nysan kún batareıalary arqyly tolyqtaı elektr qýatymen qamtylýda. Týrıstik joba boıynsha 40 jańa jumys orny ashylmaq.
