Jambyl oblysynda mıkroavtobýs janyp ketti

TARAZ. QazAqparat - Batys Eýropa-Batys Qytaı respýblıkalyq tas jolynyń 447 shaqyrymynda Jambyl oblysy Alǵabas aýyly mańynda Almatyǵa ketip bara jatqan «Mercedes-Benz Sprinter» jolaýshy tasymaldaýshy kóligi órtenip ketti, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń bergen málimetterine súıensek, T.Rysqulov aýdanynyń Tótenshe jaǵdaı bólimi, Jedel járdem qyzmeti jáne Jambyl oblystyq Polıtsııa departamenti PPB qyzmetkerleri baryp alǵashqy kómek kórsetken. Órttiń shyǵý sebebi anyqtalýda.

Adam shyǵyny men zardap shekkender joq.

Buǵan deıin Jańa Jambyl fosfor zaýytynda jarylys bolǵanyn habarlaǵan bolatynbyz. Oqıǵa 3 tamyz kúni saǵat 11:30-da bolǵan.

Jambyl oblystyq densaýlyq saqtaý basqarmasy baspasóz qyzmetiniń bergen málimetinshe, «NDFZ» JShS fosfor zaýyty qoımasynyń aýmaǵynda konteınerlik tsısternadan sary fosfor shyǵarylǵan.

Saldarynan 1991 jyly týǵan eki azamat Ormanov D.J. jáne 1997 jyly týǵan Qaldybaı Sh.E. zardap shegip, aýrýhanaǵa jetkizildi.

Sondaı-aq, Jambyl oblysynda turǵyn úıde órt bolyp, 50-den astam adam qutqarylǵanyn habarlaǵan bolatynbyz.

Oqıǵa ornyna Jambyl oblystyq tótenshe jaǵdaılar departamentiniń qyzmetkerleri jedel jetip, baspaldaq arqyly 50 adamdy evakýatsııalap, qaýipsiz jerge kóshirdi. Onyń 20-sy - bala.

Apattar medıtsınasy ortalyǵy fılıalynyń dárigerleri men psıhologteri atalǵan kópqabatty turǵyn úıdiń turǵyndaryna psıhologııalyq kómek kórsetti.

«Órt saǵat 12.44-te oqshaýlanyp, saǵat 12.47-de joıyldy. Órttiń jalpy aýdany 30 sharshy metrdi qurady. Qazirgi ýaqytta órttiń shyǵý sebebi anyqtalýda.

Órtti sóndirýge oblystyq tótenshe jaǵdaılar departamentiniń 33 qyzmetkeri men 7 birlik tehnıka jumyldyryldy», - deıdi oblystyq tótenshe jaǵdaılar departamentiniń baspasóz qyzmeti.