Jambyl oblysynda dárigerlerge 36 jedel járdem kóligi berildi
Oblystyq bıýdjet esebinen alynǵan 39 qyzmettik kóliktiń Jambyl jáne Jýaly, Shý aýdandaryna 3 avtokólikten, Qordaı aýdanyna 11, Merki jáne Moıynqum men Sarysý aýdandaryna 2 avtokólikten, Turar Rysqulov aýdanyna 9, Talas aýdanyna 1 avtokólik berildi.
Saltanatta sharaǵa qatysqan Jambyl oblysy ákiminiń orynbasary Erkebulan Daýylbaev óńirdegi densaýlyq saqtaý salasynyń kórsetkishterine toqtalyp ótti.
«Jalpy oblysta 390 densaýlyq saqtaý nysany qyzmet kórsetedi. Onyń 29-aýrýhana. Ambýlatorııalyq – emhana sany–350, basqalary– 11. Ótken jyly memlekettik-jekeshelik áriptestik sheńberinde 29 nysan salyndy. Bul oraıda ózge óńirlerdegi bıýdjettik ınvestıtsııalyq jobalarmen salystyrǵanda ol nysandardyń quny aıtarlyqtaı tómen bolyp, 1,4 mıllıard teńge bıýdjet qarajaty únemdeldi. Bıyl memlekettik-jekemenshik áriptestik sheńberinde oblys aýmaǵyndaǵy eldi mekenderde 65 densaýlyq saqtaý uıymdarynyń ǵımarattaryn salý josparlanǵan. Osylaısha, óńirde 2020 jylǵa deıin qajetti ǵımarattar salý máselesi 100 paıyz sheshiledi»,-dedi Erkebulan Daýylbaev.
Sondaı-aq, oblys ákimi orynbasarynyń aıtýynsha, «Dıplommen aýylǵa!» baǵdarlamasy sheńberinde bıylǵy jyldyń jeti aıynda óńirge 37 jas maman kelgen. Jalpy, kelgen 37 jas mamannyń ishinde 9 jas maman – qalada, 28 jas maman – aýdandarda eńbek etýde.
«Qalalyq jedel járdem stansasynda 2014 jyly 56 sanıtarlyq avtokólik bolsa, sol jyly oblystyq bıýdjetten 4 kólik alynyp, barlyǵy kólik sany 60-qa jetti. 2018 jyldyń 1 shildesinen bastap, jedel járdem qyzmeti ortalyqtandyrylyp, «Jambyl oblystyq jedel járdem stansasy» bolyp ózgertildi. Ótken jyly 253 mln teńgege 27 dana avtokólik satyp alynyp, turǵyndar ıgiligine berildi. Munyń barlyǵy oblys turǵyndarynyń jaıly ómir súrý úshin jasalyp jatqan sharalar», – dedi E. Daýylbaev.
