Jambyl oblysynda brakonerler Qyzyl kitapqa engen arqardy aýlaǵan
Jambyl oblysy polıtsııa departamenti jergilikti polıtsııa qyzmeti basqarmasy jáne tabıǵat qorǵaý polıtsııasynyń qyzmetkerleri Qordaı APB-men birge Qyzyl kitapqa engen arqardy óltirgen Almaty qalasynyń 3 turǵynyn jáne Qordaı aýdanynyń bir turǵynyn qolǵa túsirdi. Bul týraly PD baspasóz qyzmeti habarlady.
«Kıik» jedel-aldyn alý is-sharasyn júrgizý barysynda «Ohotozooprom» RMK ınspektorlarymen birlesip respýblıkalyq mańyzy bar Jýsandala erekshe qorǵalýǵa jatatyn aýmaǵynyń «Babasaı» taýly jer ýchaskesinde Nissan-Patrol jáne UAZ-3163 markaly 2 avtokólik toqtatylǵan. 46 jáne 57 jastaǵy eki júrgizýshimen, sondaı-aq 43 jáne 53 jastaǵy jolaýshylarmen júrgizilgen saýalnama barysynda olardyń joǵaryda atalǵan qoryq aımaǵyna zańsyz ań aýlaý maqsatynda kelgeni anyqtaldy» delingen habarlamada.
Tekserý barysynda ustalǵan avtokólikterdiń biriniń salonynan qara tústi polımerlik qaptamaǵa salynǵan arqardyń eti tabylyp, tárkilendi.
Ustalǵandar kinásin moıyndap, olardan aıǵaq zat retinde qylmys quralyna aınalǵan 4 tirkelgen kesik myltyq alyndy.
Atalǵan fakti boıynsha QR QK 337-baby boıynsha sotqa deıingi tergeý bastalǵan.
«Sonymen qatar, oqıǵa ornynan 2,5 km qashyqtyqtan ańnyń basy, ishki músheleri, terisi men aıaq-qoldary tabylyp, tárkilendi. Qazirgi ýaqytta is boıynsha joǵaryda atalǵan tulǵalardyń Qyzyl kitapqa engen arqardy zańsyz aýlaýynyń mán-jaılaryn anyqtaýǵa baǵyttalǵan tergeý amaldary júrgizilýde. Sot-bıologııalyq saraptamanyń qorytyndysyna sáıkes brakonerler memleketke 12 mıllıon teńge kóleminde zalal keltirgen» deıdi polıtsııa.
