Jambyl oblysynda bıyl 13 ınvestıtsııalyq joba iske asyrylyp jatyr
Basqosý Youtube-tegi oblys ákimdiginiń arnasy arqyly tikeleı efırde kórsetildi.
Kásipkerlik jáne ındýstrıaldy-ınnovatsııalyq damý basqarmasynyń basshysy Aspandııar Seısebaev atqarylyp jatqan jumys barysyn baıandady.
Jambyl oblysynda ındýstrııalyq-ınnovatsııalyq damý baǵdarlamasy aıasyndaǵy 26 joba boıynsha 6 myńǵa jýyq jumys ornyn ashý josparlanyp otyr. Іske asyrý merzimi – 2020-2025 jyldar aralyǵy. Olardyń qatarynda hımııa ónerkásibi, agroónerkásip kesheni, metallýrgııa, farmatsevtıka, mashına jasaý salalaryndaǵy jobalar bar.
2019 jyly jalpy somasy 4,5 mlrd teńgege 4 joba iske asyryldy. Atap aıtsaq, «Greenwill» JShS akvaponıka tehnologııasy negizinde salat daqyldary men balyq óndirisi jolǵa qoıylyp, «Super-pharm» JShS bir rettik medıtsınalyq maqsattaǵy buıymdardy óndirý zaýytynyń korpýsy ashyldy, «Qordaı sút ónimi» JShS balmuzdaq óndirý boıynsha jańa avtomattandyrylǵan jelisin engizse, al, «Qordaıkorm» JShS malǵa arnalǵan qurama jem óndirisin keńeıtti. Barlyǵy 350 turaqty jumys orny qurylǵan.
Bıyl jalpy quny 84,9 mıllıard teńge 13 ınvestıtsııalyq jobany iske asyrý josparlanǵan.
Búgingi kúnge deıin «Astana Food Storage» JShS aýylsharýashylyq parkin ashsa, «Wind powercity» JShS jel elektr stansasy jumysyn bastady. Sondaı-aq, «Azııa Sad» JShS qarqyndy baqshany iske qosqan.
Jyl sońyna deıin 66,1 mlrd teńgege taǵy 10 joba júzege asyrylmaq.
Berdibek Saparbaev jobalar kelesi jylǵa qalmas úshin barlyq jaǵdaıdy aldyn-ala eskerip, máselelerdi der kezinde sheshýdi tapsyrdy.
Tıisti basqarma 2015-2019 jyldar aralyǵynda júzege asyrylǵan 31 jobany taldap, 11 kásiporynnyń óziniń tolyq qýattylyǵynyń 50 paıyzynan asa almaǵanyn anyqtaǵan.
«Taraz qalasy men aýdan ákimdikteri shıkizatpen, eksportpen qamtamasyz etý máselelerin sheshýge baǵyttalǵan Jol kartasyn ázirleýi kerek. Ol aldaǵy ýaqytta kásiporyndardyń tolyq qýatyna shyǵýyna múmkindik beredi», - dedi Aspandııar Seısebaev.
Spıker ásirese Jýaly, Merki, Jambyl jáne T.Rysqulov aýdanynda ınvestıtsııalardy tartý jumystary tıisti deńgeıde júrgizilmegendigin atap ótti.
Osy turǵyda týyndaǵan suraqtarǵa aýdan ákimderi mardymsyz jaýaptar qaıyrdy. Olardyń aıtýynsha, jobalar joq emes, degenmen olar ázirge tek talqylaý satysynda eken.
«Aýdandarda múmkindikter óte kóp, biraq ákimder kabınetterinde otyryp alyp, ınvestorlardyń ózderi kelýin kútedi. Olar tipti oblys ákimdiginiń basqarmalarymen, kásipkerlik nysandarymen birlesip jumys jasaý týraly oıǵa da almaıdy. Eger sizder óz mindetterińizge jaýapkershilikpen qarasańyzdar, onda aýylsharýashylyǵy salasynda kóptegen biregeı jobalardy júzege asyrýǵa bolar edi. Mysaly, Jýaly aýdanynda kartop talaıdan beri ósirilip keledi. Biraq egin alqaptary men ónim kólemin ulǵaıtýǵa, tehnıkamen qamtýǵa kómektesý qajet.
Kókónister men jemistermen qamtamasyz etý máselesin sheshýge bolady. Balamaly energııa kózderin paıdalana otyryp, bıznesti damytýǵa múmkindik jetkilikti. Ákimder bul týraly oılasyp, áleýetti ınvestorlardy tartý, memlekettik baǵdarlamalar sheńberinde bıznes-jobalardy qoldaý boıynsha jumystar júrgizý kerek», - dedi aımaq basshysy.
Jıyndy qorytyndylaı kele, Berdibek Saparbaev jaýapty tulǵalarǵa jylytý maýsymy men koronavırýs pandemııasynyń ekinshi tolqynyna daıyndyq, qashyqtyqtan oqytý sapasyn arttyrý boıynsha naqty tapsyrmalar júktedi.
