Jambyl oblysynda aýyldyq okrýg ákimderiniń saılaýyna 122 kandıdat usynyldy

TARAZ. QazAqparat – Jambyl oblysynda aýyldyq okrýg ákimderiniń saılaýyna 122 kandıdat usynyldy. Bul týraly óńirlik kommýnıkatsııalar qyzmetiniń alańynda Jambyl oblystyq saılaý komıssııasynyń tóraǵasy Serǵalı Aıdapkelov málim etti, dep habarlaıdy QazAqparat tilshisi.

Eń kóp úmitker Jambyl aýdanynyń enshisinde. Onda bir orynǵa 4,2 adam usynylǵan. Al oblystaǵy ortasha básekege qabilettilik 3,2 adamdy qurady.

Serǵalı Aıdapkelovtiń aıtýynsha, óńirde saılaý protsesi bastalǵannan beri aýyldyq okrýg ákimderine 122 kandıdat usynyldy. Al 9 shilde usyný merzimi aıaqtalǵan kúni ár okrýgke ekiden kóp kandıdat úmit bildirgen.

Usynylǵan kandıdattardan 76 adam (62%) - saıası partııalardan bolsa, 46 adam (38%) - ózin-ózi usynǵandar sanalady.

«Nur Otan» partııasynan 31 kandıdat, «Aýyl» HDPP – 16 kandıdat, «Aq jol» QDP – 16 kandıdat, «ADAL» saıası partııasynan – 2 kandıdat, QHP – 11 kandıdat. Usynylǵan 122 úmitkerdiń ortasha jasy 39,8. Al 25 úmitker názik jandylar», - dedi S.Aıdapkelov.

Qazirgi ýaqytta ýákiletti memlekettik organdarmen usynylǵan kandıdattardyń zańnama talaptaryna sáıkestigin anyqtaý jáne olardy tirkeý jumystary júrgizilýde. Ol aǵymdaǵy jyly 14 shildede saǵat 18.00-de aıaqtalady.

Kandıdattardy tirkegennen keıin saılaý aldyndaǵy úgit bastalyp, ol 23 shildege deıin jalǵasady.