Jambyl oblysynda 20 myńǵa jýyq jumysshynyń jalaqysy 26 paıyzǵa ósti

TARAZ. QazAqparat – 2020 jyly Jambyl oblysy koronavırýs pandemııasynyń saldaryna qaramastan ekonomıkanyń negizgi salalarynda ósimge qol jetkize aldy. Bul týraly aımaq basshysy Berdibek Saparbaev halyqqa esep berý kezdesýi barysynda aıtty, dep habarlaıdy QazAqparat tilshisi.

«Biz barlyq qıyndyqtardy birge eńserip kelemiz. Memleket basshysynyń qoldaýynyń jáne jerlesterimizdiń qajyrly eńbeginiń arqasynda ekonomıka 102,2 paıyzǵa ósti. Ónerkásiptegi óndiris kólemi 2019 jylǵy deńgeımen salystyrǵanda 3,1 paıyzǵa, aýyl sharýashylyǵynyń jalpy ónimi 5,1 paıyzǵa artty. Al, turǵyn úı qurylysynyń kólemi 28,2 paıyzǵa ósip, 344,1 mıllıard teńge ınvestıtsııa tartyldy», - dedi Berdibek Saparbaev.

Óńirdegi ónerkásip kásiporyndarymen 505 mıllıard teńgeniń ónimi óndirilgen.

Inflıatsııa deńgeıi 7,3 paıyzdy quraǵan. Aǵymdaǵy jyly bul kórsetkishti 4-6 paıyz aralyǵyna tómendetý úshin áleýmettik mańyzy bar azyq-túlik taýarlarynyń baǵasyn turaqtandyrý boıynsha birqatar sharalar qabyldanýda. Bul mindetke qol jetkizý maqsatynda naqty is-qımyl jospary qurylǵan.

«Alqaptan sórege deıin» jobasy aıasynda jumystardy kúsheıte túsetin bolamyz, áleýmettik pavılondar jelisin keńeıtip, aýylsharýashylyq jármeńkelerin ótkizýdi jalǵastyramyz», - dedi B. Saparbaev.

Ótken jyly jumys oryndaryn saqtaýǵa, óndiris kólemin ulǵaıtýǵa jáne jumysshylar aldyndaǵy áleýmettik mindettemelerdi oryndaýǵa aıryqsha nazar aýdaryldy. Jambyldyq 4508 kásiporyn basshylyǵymen tıisti memorandýmdarǵa qol qoıyldy. Nátıjesinde 41 jeke kásiporyndaǵy 19,4 myń jumysshynyń ortasha jalaqysy 26 paıyzǵa kóterildi.

«Álbette, biz munymen toqtap qalmaımyz. Ári qaraı da úılesimdi jumys jasap, jańa belesterdi baǵyndyratyn bolamyz», - dedi Berdibek Saparbaev jambyldyqtarǵa.