Jambyldyq sharýalarǵa sý berý kestesi jańadan bekitildi

ASTANA. KAZINFORM – Jambyldyq sharýalarǵa sý berý kestesi jańadan bekitildi. Bul týraly Ortalyq kommýnıkatsııalar qyzmetindegi brıfıngide Sý resýrstary jáne ırrıgatsııa birinshi vıtse-mınıstri Nurlan Aldamjarov málimdedi. 

– Qys-kóktem mezgilindegi jaýyn-shashynnyń az túsýine baılanysty Teris-Aşybulaq, Qaraqonyz jáne Búrkitti sý qoımalarynda sý kólemi ótken jylmen salystyrǵanda tómen. Osyǵan baılanysty sharýa qojalyqtarymen kelisilgen jańa sý berý kesteleri ázirlenip, bekitildi. Jambyl, Talas jáne Baızaq aýdandarynyń jergilikti atqarýshy organdarymen kezdesýler ótkizildi, - dedi ol.

Onyń atap ótýinshe, olarǵa sý tutynýdyń beıimdelgen rejımine kóshý boıynsha mynadaı usynystar berildi:

• sýarýdy negizinen túngi ýaqytta uıymdastyrý;

• sýarý jumystarynyń naqty kezektiligin engizý;

• kópjyldyq shópterdi sýarýdy bir aınalymmen shekteý.

– Buǵan qosa, 1 shildege deıin Qordaı aýdanyndaǵy Qaınar aýylynda qosymsha sý aıdaıtyn sorǵy stansasynyń qurylysy aıaqtalady dep josparlanyp otyr. Bul nysan tómengi aýmaqtarǵa sý jetkizýdi kóbeıtip, negizgi kanalǵa túsetin júktemeni azaıtýǵa jáne sý tapshylyǵyn ishinara óteýge múmkindik beredi. Stansa qurylysy aıaqtalǵanǵa deıin sýdy úsh kún saıyn berý kestesimen aınalymdy rejımge kóshý týraly ýaqytsha sheshim qabyldandy. Buǵan qosymsha, «Qazsýshar» fılıalynyń kúshimen Georgıev magıstraldyq kanalyna sekýndyna 2 tekshe metrge deıin qosymsha sý berý úshin Shý ózeniniń bir bóligin tazalaý jumystary júrgizildi, - dedi ol.

Taıaýda Úkimet basshysy Oljas Bektenov vegetatsııalyq kezeńde sý táýekelderin basqarý jónindegi óńirlik shtabtar qurýdy tapsyrǵan edi.