Jambyldyq qyzylsha ósirýshilerge 3 mlrd teńge qaryz qaıtarylady

ASTANA. KAZINFORM — Ótken maýsymda fermerler qyzylshany belgilengen baǵadan úsh ese arzan baǵada tapsyrýǵa daıyn bolǵanymen, sol qarajatty da der kezinde ala almaı, aqshalaryn bir jylǵa jýyq kútýge májbúr boldy, dep habarlaıdy Kazinform tilshisi.

Jambyl oblysy aýyl sharýashylyǵy basqarmasynyń basshysy Qaırat Kóshenovtiń aıtýynsha, Merki qant zaýyty fermerler aldyndaǵy qaryzyn tolyq óteıtin bolady. Bıylǵy maýsymda zaýyt ónim qabyldap, óńdeý jumystaryn júrgizýi úshin «Taraz» áleýmettik-kásipkerlik korporatsııasy» AQ arqyly burynǵy 3 mıllıard teńgeden astam qaryz óteledi.

— Sonymen qatar, Merki qant zaýytymen qantty forvardtyq kelisimshart negizinde satyp alýǵa jergilikti bıýdjetten 2,3 mlrd teńge bólindi, — dedi Q.Kóshenov.

Ýáde boıynsha, zaýyt fermerlermen esep aıyrysýdy qyrkúıek aıynyń sońyna deıin nemese qarashanyń basyna qaraı aıaqtamaq. Dál sol kezde 2025 jylǵy ónimdi qabyldaý bastalady.

— Bıyl bul daqyl oblys boıynsha 5,2 myń gektar alqaptan jınalady. Basqarma júrgizgen taksatsııa nátıjesine sáıkes, shamamen 250 myń tonna taza ónim alý josparlanyp otyr, — dedi Qaırat Kóshenov.

Ótken jyly qarashanyń sońynda Merki qant zaýytynda uzyn-sonar kezek paıda bolǵanyn jazǵan edik. Sebep — zaýyt fermerlerden qant qyzylshasyn qabyldap úlgermedi.