Jambyldyq kásiporyn medıtsına mekemelerin jylyna 300 mln shprıtspen qamtamasyz etpek
TARAZ. KAZINFORM — Jambyl oblysyna jumys sapary barysynda Qazaqstan Premer-Mınıstri Oljas Bektenov Shaıqoryq aýylyndaǵy «Aýylda densaýlyq saqtaýdy jańǵyrtý» ulttyq jobasy aıasynda salynǵan dárigerlik ambýlatorııaǵa baryp, oblys ortalyǵyna jaqyn mańda ornalasqan Aısha bıbi aýylyndaǵy Super-Rharm medıtsınalyq buıymdar óndiretin zaýytynyń qyzmetimen tanysty.
Úkimet basshysyna óńirde 26 densaýlyq saqtaý nysanynyń qurylysy júrgizilip jatqany baıandaldy, onyń 20-sy Ulttyq joba sheńberinde salynyp jatyr, onyń ishinde dárigerlik ambýlatorııalar, medıtsınalyq jáne feldsherlik-akýsherlik pýnktter bar.
Oblystaǵy medıtsınalyq mekemelerdiń tozýy 40,3%-dan 36,5%-ǵa deıin tómendeıdi.
Sonymen qatar 4,5 mlrd teńge 125 birlik medıtsınalyq qural-jabdyq men 30 sanıtarlyq avtokólik satyp alýǵa baǵyttaldy.
Shaıqoryq aýylynda halyq sany shamamen 6 myńǵa jetti.
Medıtsınalyq qyzmet osyǵan deıin eski ǵımaratta kórsetilip kelgen, al dıagnostıka men taldaý jasaý úshin jergilikti turǵyndar 25 shaqyrym qashyqta ornalasqan aýdan ortalyǵyna barýǵa májbúr boldy, bul ózindik qolaısyzdyq týdyratyn.
Jańa dárigerlik ambýlatorııanyń ashylýy — bul Memleket basshysynyń aýylda medıtsınalyq ınfraqurylymdy damytý, qoljetimdi sapaly medıtsınalyq kómek kórsetý týraly tikeleı tapsyrmasyn iske asyrý.
Jańa ǵımaratta zerthana, ÝDZ, EKG jáne basqa da qurylǵylar bar, tar beıindi mamandarǵa qaralyp, keńesin alýǵa bolady.
Sondaı-aq shalǵaıdaǵy eldi mekenderdiń turǵyndaryna keń aýqymdy sapaly medıtsınalyq qyzmetter kórsetýdi qamtamasyz etýge arnalǵan aýdandyq ambýlatorııaǵa jyljymaly medıtsınalyq keshen berildi.
Aýylda densaýlyq saqtaýdy jańǵyrtý» ulttyq jobasy aıasynda elimiz boıynsha barlyǵy 655 nysan salynady. Aýyldyq eldi mekenderdi medıtsınalyq mekemelerdiń jańa ǵımarattarymen qamtý úlesi ótken jylmen salystyrǵanda 2 ese artty.
Premer-Mınıstr birqatar jańa nysandardy keńeıtý qajettigin aıtyp, sondaı-aq kadr tapshylyǵy problemasyn atap ótti.
«Memleket basshysy aýyldarda densaýlyq saqtaý nysandarynyń qurylysy men jańǵyrtylýyn qamtamasyz etýdi tapsyrdy. Aýrýhanalar men emhanalar barlyq zamanaýı sapa men jaılylyq standarttaryna saı bolýy kerek. Bul jaǵdaıda tek ınfraqurylymnyń bolýy jetkiliksiz. Kadrlyq áleýetti únemi arttyryp otyrý qajet. Sondyqtan, ákimdik jańa medıtsına mekemelerin iske qospas buryn, tehnıkalyq jaraqtandyrýmen qatar, bilikti mamandardy tartýǵa nazar aýdaryp, olarǵa tıisti jaǵdaı jasaýy kerek», — dep atap ótti Oljas Bektenov.
Úkimet basshysy ákimdikke Densaýlyq saqtaý mınıstrligimen birlesip, ulttyq jospar sheńberinde jyl aıaǵyna deıin óńirdegi barlyq medıtsına nysandarynyń qurylysyn ýaqtyly ári sapaly aıaqtaýdy qamtamasyz etýdi, sondaı-aq Ǵylym jáne joǵary bilim mınıstrligimen birlesip, dárigerler men medıtsına qyzmetkerlerin tartý tetikterin kúsheıtýdi tapsyrdy.
Densaýlyq saqtaý basqarmasynyń basshysy Janar Ospanova 2022 jyldan bastap óńirge 234 jas maman kelgenin, jaqyn arada 2,5 myń dáriger biliktiligin arttyrý úshin oqýdan ótetinin jetkizdi.
Jambyl oblysynda farmatsevtıka ónerkásibin damytý boıynsha keshendi jumystar júrgizilip jatyr.
Munda bir rettik medıtsınalyq buıymdar, ınfýzııalyq eritindilerdi, qan jáne qan almastyrǵyshtardy quıýǵa arnalǵan sıstemalar, bıologııalyq suıyqtyq jınaýǵa arnalǵan konteınerler jáne t. b. óndiriledi.
Super-Pharm zaýyty otandyq medıtsınalyq mekemelerdi jylyna 300 mln kóleminde bir rettik ınektsııalyq shprıtstermen, toqyma emes materıaldardan jasalǵan buıymdarmen, leıkoplastyrlarmen, spırtti maılyqtarmen qamtamasyz etýdi josparlap otyr.
Munda shıkizattan bastap daıyn ónimge deıin tehnologııalyq protsestiń tolyq tsıkli bar.
«Otandyq ónerkásip sapaly dári-dármek pen joǵary básekege qabiletti medıtsınalyq buıymdar shyǵaryp, turǵyndar arasyndaǵy qajettilikti eskere otyryp, óndiriletin ónim qoryn jańartýy tıis. Elimizdiń densaýlyq saqtaý júıesi úshin mundaı kásiporynnyń turaqty jumys isteýi óte mańyzdy», — dedi Premer-Mınıstr.
