Jambyldaǵy aınalma kanal 40 jyldan keıin alǵash ret tazartyla bastady

ASTANA. KAZINFORM — Jambyl oblysynda Fýrmanov aınalma kanaly 40 jyldan keıin alǵash ret tazartylady, dep habarlaıdy Sý resýrstary jáne ırrıgatsııa mınıstrligi.

Túrkistan oblysynyń Sozaq aýdanyna Shý ózeniniń sýyn jetkizýdi jaqsartý maqsatynda Sý resýrstary jáne ırrıgatsııa mınıstrligi Fýrmanov aınalma kanalyn mehanıkalyq ádispen tazartý jumystaryn bastady. Tazalaý jumystaryn bıyl aıaqtap, kanal arqyly sý jiberý josparlanyp otyr. Bul Shý ózeninen ekologııalyq maqsatta jiberiletin sýdyń tıimdiligin arttyryp, Sozaq aýdanyndaǵy tabıǵı jaǵdaıdy jaqsartýǵa múmkindik beredi. Byltyr qyrkúıek aıynan bastap bıyl sáýir aıynyń sońyna deıin Shý ózeni arqyly Sozaq aýdanyna 1,5 mlrd tekshe metrden astam sý jiberilgenin eske sala keteıik. Fýrmanov aınalma kanalynyń ótkizý múmkindigi — sekýndyna 45-50 tekshe metr, uzyndyǵy — 120 shaqyrym. Nysan Jambyl oblysy Moıynqum aýdanyndaǵy Qylyshbaı, Qumózek, Qarabóget jáne Saryózek aýyldarynyń boıynan ótedi.

— Sý resýrstary jáne ırrıgatsııa mınıstrligi jyl saıyn Tasótkel sý qoımasynan Sozaq aýdanynyń ekojúıesin qoldaý úshin shamamen 200 mln tekshe metr sý jiberedi. Kanaldy tazartý sý jiberýdiń tıimdiligin arttyryp, 40 jyldan beri alǵash ret ony óz maqsatyna saı paıdalanýǵa múmkindik beredi. Sonymen qatar kanal boıyndaǵy eldi mekenderdiń sýǵa qoljetimdiligi jaqsarady. Nysanda júrgizilip jatqan jumystar mınıstrliktiń qatań baqylaýynda, — dedi vedomstvo basshysy Nurjan Nurjigitov.

Budan buryn Sý resýrstary mınıstrligi Frantsııa mamandarymen birlesip Balqash kóli basseınine zertteý júrgizgenin jazdyq.