Jambylda jaıylymnan jylqy urlaǵandar ustaldy

TARAZ. KAZINFORM – Jambyl oblysy polıtsııa qyzmetkerleri «Mal urysy» jedel-profılaktıkalyq is-sharasyn júrgizý barysynda qylmystyq toptyń is-áreketterin áshkereledi.

Kúdiktiler aldyn ala sóz baılasý arqyly Baızaq, Jambyl aýdandarynyń aýmaǵyndaǵy jaıylymdardan birneshe ret jylqy maldaryn urlap, sodan keıin olardy soıyp, satýmen aınalysqan.

«Ustalǵan azamattar ýaqytsha ustaý ızolıatoryna qamaqqa alyndy. Sondaı-aq olardyń budan basqa 4 ret mal urlaý deregine qatysty bary jáne urlanǵan 5 jylqy malyn soıyp satqany anyqtaldy. Qazirgi tańda atalǵan derekke qatysty sotqa deıingi tergeý amaldary júrgizilýde», - delingen oblystyq polıtsııa departamenti baspasóz qyzmeti taratqan aqparatta. 

Aıta keteıik, «Mal urysy» respýblıkalyq is-sharasy oblys aýmaǵynda 23 aqpanǵa deıin jalǵasatyn bolady.