Jambylda aıyppulynyń somasy kóliginiń qunynan asyp ketken júrgizýshi ustaldy
TARAZ.KAZINFORM - Ákimshilik polıtsııa qyzmetkerleri jol qozǵalysy erejelerin buzýǵa qatysty nusqamalardy tekserý barysynda "VAZ-21015" markaly avtokólikti anyqtady.
Bul kólik júrgizýshisi jol qozǵalysy erejelerin birneshe márte buzǵan, sondaı-aq aıyppuldar boıynsha bereshegi bolǵan.
Jalpy aıtqanda, júrgizýshi kólik quralymen Jambyl oblysynyń aýmaǵynda 91 ret jyldamdyq rejımin buzyp, oǵan 2 mıllıon 726 myń 400 teńge kóleminde aıyppul salynǵan.
«Taraz qalasynyń polıtsııa basqarmasy jedel basqarý ortalyǵynyń beınebaqylaý kameralary arqyly izdestirý is-sharalaryn júrgizý barysynda atalǵan avtomashına oblys ortalyǵynyń B.Momyshuly atyndaǵy kóshesinde anyqtalyp, toqtatyldy.
Kólik ıesi barlyq aıyppuldardy tólegenge deıin kólik arnaıy aıyp turaǵyna qoıyldy», — delingen oblystyq polıtsııa departamentiniń baspasóz qyzmeti taratqan habarlamada.
