Jambylda 24,5 mıllıon teńgeniń malyn urlaǵan top músheleri sottaldy

TARAZ. KAZINFORM — Jambyl oblysynda 24,5 mıllıon teńgeniń malyn urlaǵan top basshysy 7 jylǵa sottaldy, dep habarlaıdy Polisia.kz.

Talas aýdany polıtsııa bólimine osy aýdan turǵyndarynyń sharýa qojalyqtaryna tıesili túıe, jylqy jáne sıyr malyn urlaý faktileri boıynsha birneshe aryz túsken.

Prokýratýranyń úılestirýimen oblystyq PD krımınaldyq polıtsııa basqarmasy jáne Talas aýdandyq polıtsııa bólimi qyzmetkerleriniń jedel-izdestirý is-sharalary nátıjesinde óńirde mal urlyǵyn kásip etken toptyń áreketi áshkerelendi.

Talas pen Moıynqum aýdandarynyń 42, 48, 33 jáne 30 jastaǵy 5 turǵyny aldyn ala sóz baılasý arqyly 2024 jylǵy aqpannan bastap bir jyldan astam ýaqyt boıy jaıylymdardan 38 bas túıe, 16 bas jylqy jáne 1 bas sıyrdy zańsyz ıemdengen.

Keltirilgen jalpy materıaldyq shyǵyn — 24 mln 550 myń teńge. Tergeý barysynda urlanǵan maldyń basym bóligi tabylyp, ıelerine qaıtaryldy.

Barlyq faktiler boıynsha Qylmystyq kodekstiń 188-1-babymen (Mal urlyǵy) sotqa deıingi tergep-tekserý amaldary júrgizilip, is sotqa joldandy. Sot úkimimen qylmysty uıymdastyrýshy 7 jylǵa bas bostandyǵynan aıyryldy. Al onyń úsh sybaılasyna 3 jyldan shartty túrde, bireýine 2 jylǵa bas bostandyǵynan aıyrý jazasy taǵaıyndaldy.

Buǵan deıin Astana mańynda mal urlyǵymen aınalysqan top ustalǵan bolatyn.